’کورونا وائرس سے صورتحال تشویشناک، پاکستانیو! جاگو اس سے پہلے کہ بہت دیر ہو جائے‘

کراچی: (دنیا نیوز) ترجمان سندھ حکومت بیرسٹر مرتضیٰ وہاب نے اپنے ایک اہم ویڈیو بیان اور ٹویٹ کے ذریعے کورونا وائرس کے بڑھتے کیسز اور تشویشناک صورتحال سے عوام کو آگاہ کیا ہے۔

بیرسٹر مرتضیٰ وہاب کا ٹویٹ میں کہنا تھا کہ پاکستان میں پہلا کورونا پازیٹو کیس 26 فروری کو رپورٹ ہوا، اس کے بعد 29 روز میں پاکستان بھر میں کورونا وائرس کے شکار مریضوں کی تعداد ایک ہزار ہو گئی تھی۔

مرتضیٰ وہاب نے لکھا کہ پچھلے سات روز میں پاکستان میں کورونا پازیٹو کی تعداد دو ہزار تک پہنچ گئی، جبکہ پانچ روز میں یہ تعداد تین ہزار تک پہنچ گئی ہے۔

ان کا سخت تشویش کا اظہار کرتے ہوئے کہنا تھا کہ غالباً تین روز میں کورونا وائرس کے شکار مریضوں کی تعداد چار ہزار تک پہنچ جائیگی۔ اندازہ کریں کہ صورتحال کتنی سنگین اور پریشان کن ہے۔

Pakistan’s got its 1st #COVIDー19 patient on 26th February. We got our 1000th patient in 29 days. The 2000th patient in 7 days, 3000th patient in 5 days & probably the 4000th patient in 3 days. This is how serious the situation is. Pakistaniyo plz wake up before its too late

— SenatorMurtaza Wahab (@murtazawahab1) April 7, 2020

انہوں نے عوام سے اپیل کرتے ہوئے کہا کہ پاکستانیو! جاگو اس سے پہلے کہ بہت دیر ہو جائے۔ بعد ازاں ایک ویڈیو بیان میں ان کا کہنا تھا کہ ہمیں وفاقی حکومت کے چودہ اپریل تک کے لاک ڈاؤن پر موثر عملدرآمد کرنا ہے اور ہمیں خود کو بچاتے ہوئے دوسروں کو بھی محفوظ رکھنا ہے۔

ترجمان سندھ حکومت نے کہا کہ صوبے میں لاک ڈاؤن پر عملدرآمد کرایا جا رہا ہے لیکن اسے مزید سخت کرنے کی ضرورت ہے۔ شہری حکومت کا ساتھ دیں اور احتیاطی تدابیر اپنائیں۔ اس وقت سندھ میں دو سو ستر کورونا مریض صحیتاب ہو چکے ہیں۔ یہ لاک ڈاؤن اور خود کو آئسولیشن میں رکھنے سے ممکن ہوا۔ اس وبا سے چھٹکارا حاصل کرنے کے لئے اپنے گھروں پر رہیں۔