کراچی: (ویب ڈیسک) وفاقی تحقیقاتی ایجنسی (ایف آئی اے ) نے معروف پاکستانی ماڈل و اداکارہ نادیہ حسین کے شوہر عاطف خان کو گرفتار کرلیا۔
ایف آئی اے ذرائع کے مطابق عاطف احمد خان کو ایف آئی اے کارپوریٹ کرائم سرکل نے کراچی کے علاقے ڈیفنس فیز 6 میں ان کی رہائش گاہ پر چھاپے کے دوران حراست میں لیا۔
حکام کے مطابق عاطف احمد خان نجی بینک کے چیف ایگزیکٹو آفیسر رہ چکے ہیں اور ان پر کمپنی کے فنڈز میں مبینہ طور پر 54 کروڑ روپے سے زائد کی مالی بے ضابطگیوں کا الزام ہے۔
ایف آئی اے کی جانب سے بتایا گیا کہ ملزم عاطف احمد خان پر الزام ہے کہ انہوں نے کمپنی کے 80 ملین روپے ذاتی ٹریڈنگ کے لیے استعمال کیے،انہوں نے غیر قانونی طور پر 654 ملین روپے تھرڈ پارٹی سے حاصل کیے اور انہیں کمپنی کے فنڈز سے زیادہ مارک اپ کے ساتھ واپس کیا۔
وفاقی تحقیقاتی ایجنسی کی جانب سے مزید بتایا گیا کہ عاطف احمد خان نے کمپنی کے مالیاتی ریکارڈ میں جعلسازی کی تاکہ اپنی مالی بدانتظامیوں کو چھپایا جا سکے، تحقیقات کے بعد ہی ملزم کو گرفتار کر کے مقدمہ درج کیا گیا ہے، عدالت نے ملزم عاطف خان کا 4 روزہ جسمانی ریمانڈ بھی منظور کرلیا ہے۔
واضح رہے کہ اداکارہ نادیہ حسین کے شوہر کیخلاف یہ کارروائی نجی بینک کے گروپ ہیڈ کی شکایت پر کی گئی ہے، جنہوں نے عاطف احمد خان پر مالی بے ضابطگیوں اور ریکارڈ میں ہیرا پھیری کے الزامات عائد کیے تھے۔
