کراچی: ( دنیا نیوز) کاؤنٹر ٹیررازم ڈیپارٹمنٹ (سی ٹی ڈی) سندھ نے سعید آباد میں انفارمیشن بیسڈ کارروائی کے دوران کالعدم بی ایل اے سے تعلق رکھنے والے دہشت گرد داہن عرف آصف چکنا کو گرفتار کر لیا۔
ترجمان سی ٹی ڈی کے مطابق ملزم داہن عرف آصف چکنا اور اس کا ساتھی محمد شفیع بی ایل اے کے دہشتگردوں کو کراچی میں سہولیات فراہم کرتے ہیں، گرفتار ملزم سے غیر قانونی اسلحہ برآمد کیا گیا۔
گرفتار ملزم داہن اور محمد شفیع قریبی ساتھی ہیں، محمد شفیع بی ایل اے کے دہشت گرد بہادر پی ایم ٹی کا بیٹا ہے جو پڑوسی ملک سے بی ایل اے کا سلیپر سیل چلا رہا ہے جبکہ کاؤنٹر ٹیررازم کی ریڈ بک میں بھی مطلوب ہے۔
ترجمان کا کہنا ہے کہ ملزم کی نشاندہی پر محمد شفیع کی گرفتاری کیلئے ٹیم حب روانہ کی جا رہی ہے، ملزمان گرفتاری سے بچنے کیلئے حب بلوچستان میں روپوش رہتے ہیں۔
سی ٹی ڈی حکام کے مطابق بی ایل اے کا گرفتار ملزم داہن اس سے قبل بھی قتل، اقدام قتل و پولیس مقابلے کے مقدمات میں گرفتار ہو کر جیل جا چکا ہے، جس سے مزید معلومات حاصل کی جا رہی ہیں۔
