کراچی: (دنیا نیوز) قومی ایئر لائن پی آئی اے کی کراچی سے ٹورنٹو کی پرواز نے ناروے کے اوسلو ایئر پورٹ پر میڈیکل ایمرجنسی لینڈنگ کی۔
ذرائع کے مطابق پرواز پی کے 783 میں سوار مسافر کی حالت بگڑ گئی تھی، مسافر کا بلڈ پریشر کم ہونے اور بے ہوشی طاری ہونے کے سبب فوری طبی امداد کی فراہمی ناگزیر ہوئی۔
حکام کا کہنا ہے کہ پرواز میں موجود 3 ڈاکٹرز نے مسافر کو ابتدائی طبی امداد فراہم کی لیکن مسافر کی حالت ٹھیک نہ ہونے پر متفقہ رائے سے ایمرجنسی ڈیکلیئر کی گئی۔
اس کے بعد کپتان نے اوسلو ایئرپورٹ پر میڈیکل ایمرجنسی کی بنیاد پر جہاز کو اتارنے کی اجازت طلب کی اور پھر ایمبولینس طلب کرتے ہوئے لینڈنگ کے بعد مسافر کو مکمل طبی امداد کے لئے ہسپتال منتقل کیا جہاں اس کی جان بچا لی گئی۔
ذرائع کے مطابق پرواز پی کے 783 نے دوبارہ اوسلو ایئرپورٹ سے ٹورنٹو کے لئے اڑان بھر لی ہے۔
ترجمان پی آئی اے کا کہنا ہے کہ ایمرجنسی میڈیکل لینڈنگ کے سبب پرواز 4 گھنٹے تاخیر کا شکار ہوئی۔
