لاہور: (دنیا نیوز) پنجاب بھر میں دیہی مراکز صحت کی آؤٹ سورسنگ کا اصولی فیصلہ کرلیا گیا۔
وزیراعلیٰ پنجاب مریم نواز کی زیر صدارت خصوصی اجلاس ہوا جس میں شعبہ صحت سے متعلق اہم فیصلے کیے گئے۔
دوران اجلاس وزیراعلیٰ کو بریفنگ میں بتایا گیا کہ ینگ ڈاکٹرز کے زیر انتظام مراکز صحت میں مریضوں کا تناسب تین گنا تک بڑھ گیا ہے، صوبہ بھر میں 225 آر ایچ سی کی ری ویمپنگ پوری طرح مکمل ہو چکی ہے، بنیادی مراکز صحت نئے شاندار کلینکس میں بدل گئے ہیں، مراکز صحت کو مریضوں کے لئے ابتدائی ریفرل سنٹر بنایا جائے گا۔
بریفنگ میں بتایا گیا کہ مراکز صحت میں بڑے ہسپتالوں کے برابر طبی اور تشخیصی سہولتیں فراہم کی جائیں گی،جنرل سرجری، گائنی،تشخیص، طبی ٹیسٹ اور دیگر سہولیات بھی میسر ہونگی،آر ایچ سی کی آؤٹ سورسنگ کے بعد نئے کلینکس ہفتہ بھر 24 گھنٹے کھلے رہیں گے۔
وزیراعلیٰ کو بریفنگ میں بتایا گیا کہ پنجاب کے ایک ہزار 147 مراکز صحت میں سے 766 کی ری ویمپنگ مکمل ہو چکی ہے اور 396 محکمہ صحت کے سپرد کر دیئے گئے ہیں، پنجاب بھر کی او پی ڈیز میں 6 ارب 70 کروڑ سے زائد کی مفت ادویات فراہم کی جا چکی ہیں،مریم نواز کمیونٹی ہیلتھ انسپکٹر پروگرام کیلئے 12 ہزار 671 درخواستیں موصول ہوچکی ہیں۔
حکام کا مزید کہنا تھا کہ مریم نوازکمیونٹی ہیلتھ انسپکٹر پروگرام کے تحت گھروں کے سروے، ڈیٹا اور دیگر تفصیلات حاصل کی جائیں گی، چیف منسٹر سپیشل اینی شیٹیو ٹرانسپلانٹ پروگرام کے تحت پانچ رینل اور ایک لیور ٹرانسپلانٹ کامیابی سے مکمل کر لیا گیا ہے،چیف منسٹر چلڈرن ہارٹ سرجری پروگرام کے تحت 6900 مریض رجسٹرڈ اور 2625 مستفید ہوچکے ہیں۔
چیف منسٹر ڈائیلسز پروگرام کے تحت 8 ہزار سے زائد مریضوں کا ڈائیلسز مکمل اور 7 ہزار 630 مزید مریض رجسٹر ہوئے ہیں،پنجاب بھر میں کلینک آن ویل سے 72 لاکھ مریض مستفید ہوچکے ہیں۔
اجلاس کے دوران وزیراعلیٰ مریم نواز نے مری کے سامبلی جنرل ہسپتال کی رابطہ سڑکوں کی تعمیر و توسیع ، جناح ہسپتال پی آئی سی ٹو کو 30 ستمبر تک فعال کرنے کی ہدایت کی اور نوازشریف انسٹی ٹیوٹ آف سرگودھا میں جون تک او پی ڈی فعال کرنے جبکہ نوازشریف کینسر ہسپتال کومقررہ مدت میں فعال کرنے کا حکم دیا۔
دوران اجلاس ڈویژنل لیول پر ہر مرض کے علاج کے لئے میڈیکل سٹی بنانے کی تجویز کا جائزہ لیا گیا جبکہ ہر ضلع کی سطح پر برن یونٹ،کارڈیک سنٹراور چلڈرن وارڈ بنانے پر اتفاق ہوا، لاہور رنگ روڈ کے اطراف میں میگا میڈیکل سٹی قائم کرنے کی تجویز پر غور کیا گیا۔
اس موقع پر گفتگو کرتے ہوئے وزیراعلیٰ پنجاب مریم نواز کا کہنا تھا کہ پنجاب کے سرکاری ہسپتالوں میں 100 فیصد بہتری لانا ہدف ہے،ہسپتالوں میں مناسب صفائی نا ہونا انتہائی افسوسناک اور تکلیف دہ امر ہے، پسماندہ اور دوردراز علاقوں کے عوام کو بھی جدید ترین طبی سہولتوں کی ضرورت ہے۔
مریم نواز نے مزید کہا کہ پنجاب کے تمام ہسپتالوں میں ضرورت کے مطابق جدید ترین طبی آلات مرحلہ وار فراہم کررہے ہیں،ڈاکٹروں اور سٹاف کی کمی کے مسئلے پر قابو پانے کے لئے پائیدار اقدامات کیے جارہے ہیں۔
