فیصل آباد: (دنیا نیوز) فیصل آباد سول ہسپتال کے ایمرجنسی وارڈ کی لفٹ گذشتہ 3 ماہ سے خرابی کی وجہ سے بند پڑی ہے جس کی وجہ سے روزانہ سینکڑوں مریضوں اور ان کے لواحقین کو مشکلات کا سامنا کرنا پڑرہا ہے ۔
ڈسٹرکٹ ہیڈ کواٹر ہسپتال فیصل آباد کا دوسرا بڑا ہسپتال ہے جس کے ایمر جنسی وارڈ میں روزانہ شہر میں ہونے والے سینکڑوں ٹریفک حادثات اور لڑائی جھگڑوں کے مریضوں کو طبی امداد کے لئے لایا جاتا ہے۔
ایمرجنسی وارڈ کے گراونڈ فلور پر مریض کو ابتدائی طبی امداد دینے کے بعد فرسٹ فلور پر میڈیکل ایمرجنسی، سینکڈ فلور پر سرجیکل ایمرجنسی یا پھر تھرڈ فلور پر آرتھو ایمرجنسی میں شفٹ کیا جاتا ہے لیکن گذشتہ 3 ماہ سے ایمرجنسی وارڈ کی لفٹ خراب ہونے کی وجہ سے بند پڑی ہے جس کا خمیازہ شہریوں کو بگھتنا پڑ رہا ہے جو مریض کو وہیل چئیر پر بٹھا کر یا سٹریچر پر لٹا کر ریمپ کے ذریعے منتقل کرنے پر مجبور ہیں۔
شہریوں کا کہنا ہے چیک اپ اور ضروری ٹیسٹوں کے لئے روزانہ 2 سے 3 بار مریض کو ریمپ سے نیچے اور اوپر لے کر جاتے ہیں جو کہ انتہائی تکلیف دہ عمل ہے، ڈائریکٹر ایمرجنسی کے مطابق لفٹ کی عمر پوری ہوچکی ہے ۔ لفٹ کی مرمت کے لئے اقدامات اٹھائے جارہے ہیں۔
حکومت سرکاری ہسپتالوں میں اربوں روپے خرچ کرنے کی دعویدار تو ہے لیکن ہسپتالوں کا کوئی پرسان حال نہیں۔
