نئی دہلی: (دنیا نیوز) مودی سرکار جعل سازی اور فیک نیوز آپریشن سے باز نہ آئی، پاکستان کے بعد اب سکھوں کو جعلی سوشل میڈیا اکاؤنٹس کے ذریعے نشانہ بنانے کا انکشاف ہوا ہے، سنٹر فار انفارمیشن ریزیلئنس نے سنسنی خیز رپورٹ جاری کردی۔
مودی سرکار کی ایک اور جعل سازی پکڑی گئی، جعلی سوشل میڈیا اکاؤنٹس سے سکھوں کو نشانہ بنایا گیا، غیر سرکاری ادارے نے نیٹ ورک کو بے نقاب کردیا۔
سینٹر فار انفارمیشن ریزیلئنس کی رپورٹ کے مطابق 80 سے زائد جعلی اکاؤنٹس سوشل میڈیا پر متحرک تھے۔ ان اکاؤنٹس سے سکھوں کو نشانہ بنایا جاتا تھا اور ان کے نظریات کو تبدیل کرنے کے لیے پروپیگنڈا کیا جاتا تھا۔
رپورٹ کے مطابق ان اکاؤنٹس سے کسان مظاہرین کو خالصتانی ایجنٹ کہا گیا اور بی جے پی کے حامی اہم شخصیات نے ان ٹویٹس کو ری ٹویٹ کیا۔
رپورٹ میں کہا گیا کہ یہ جعل سازی کسی سوچی سمجھی سازش اور بڑے آپریشن کا حصہ معلوم ہوتی ہے تاکہ سکھوں کے ذہن سے آزادی کے خیال کومٹایا جاسکے۔
