ویلنگٹن:(روزنامہ دنیا) زیادہ تر ماہرین نے کورونا وائرس کی وبا کے آغاز کے سلسلے میں یہی کہا ہے کہ اس کیلئے ذمہ دار پرندہ چمگادڑ ہےتاہم اس پرندے کو نیوزی لینڈ میں سال کے ‘بہترین پرندے ’ کا ایوارڈ دے دیا گیا ہے ۔
میڈیا رپورٹ کے مطابق فوریسٹ اینڈ برڈ نامی ادارہ یہ مقابلہ ہر سال منعقد کراتا ہے ۔ نیوزی لینڈ میں پائے جانے والی چمگادڑ کی قِسم پیکا پیکا تُو روا کو مقابلے میں 3 ہزار ووٹوں سے برتری حاصل ہوئی، فوریسٹ اینڈ برڈ کے مطابق مقابلے میں تقریباً 58 ہزار ووٹ تھے اور وہ دنیا بھر سے آئے تھے۔
پیکا پیکا توُ روا یا لمبی دُم والی چمگادڑ دنیا میں سب سے زیادہ نایاب ممالیہ ہیں، چمگادڑ نیوزی لینڈ کا واحد آبائی زمینی ممالیہ بھی ہے ۔ ان کا سائز انگوٹھے جتنا ہوتا ہے اور جب یہ پیدا ہوتے ہیں اس وقت یہ شہد کی بڑی مکھی جتنے چھوٹے ہوتے ہیں ۔چمگادڑ نے یہ مقابلہ گزشتہ برس کے فاتح پرندے کاکاپو سے جیتا، جو دنیا کا واحد ایسا طوطا ہے جو رات بھر جاگتا ہے اور اڑتا نہیں۔
