لاہور: (دنیا نیوز) پنجاب میں پہلی مرتبہ جدید مصنوعی اعضا کی ٹیکنالوجی ”بایونکس“ کا آغاز، وزیراعلیٰ نے 6 سالہ سہیل کو ”بایونکس“ ٹیکنالوجی کے مصنوعی بازو لگوادیئے۔
” بایونکس“ ٹیکنالوجی سے بنے اعضا میں دماغ کے سگنل کے مطابق حرکت دینے کی صلاحیت ہوتی ہے، دماغ سے خود کارسگنل ملنے پر حرکت کرنے والے بازو کی تنصیب سے ننھے سہیل کی زندگی بدل گئی، کم سن سہیل نے حادثے کے بعد پہلی مرتبہ اپنے دونوں ہاتھوں کو حرکت دی۔
وزیراعلیٰ مریم نواز شریف کرنٹ لگنے سے کہنی کے نیچے بازو سے محروم 6 سالہ بچے کو خود سٹیج پر لے کر آئیں، وزیراعلیٰ نے ننھے سہیل سے ہاتھ ملا کر ہائی فائیو کیا،مریم نواز نے سہیل کی حوصلہ افزائی کی اور پیار کیا۔
اس موقع پر وزیراعلیٰ مریم نواز نے سپیشل افراد کیلئے معاون آلات کے پراجیکٹ کا افتتاح بھی کردیا، تقریب میں خود کار وہیل چیئر، پیڈز وہیل چیئر،ٹرائی وہیل سکوٹی اور دیگر معاون آلات دئیے گئے۔
تقریب میں پنجاب بھر سے 300 سے زائد سپیشل افراد نے شرکت کی، سپیشل بچوں نے تقریب میں قومی ترانے، ترجمہ تلاوت کو اشاروں کی زبان میں بیان کیا جبکہ صوبائی وزیر سہیل شوکت بٹ نے پراجیکٹ کی تفصیلات سے آگاہ کیا۔
صوبائی وزیر سہیل شوکت بٹ نے تقریب سے خطاب میں کہا کہ صوبہ بھر میں سپیشل افراد کو ایک ارب کے مصنوعی اعضا، الہ سماعت، وہیل چیئر اور دیگر آلات مفت دئیے جائیں گے،سپیشل افراد کو مینوئل وہیل چیئر، رولیٹر، ٹرائی سائیکل،الیکٹرک اور موٹررائزڈ وہیل چیئر دئیے جائیں گے۔
ٹرائی موٹر سائیکل، واکنگ واکر، فریم موبائل ٹائلٹ چئیر، پیڈز وہیل چیئر، کنٹرولڈ وہیل چیئر بھی دی جائے گی، سپیشل افراد کو ضرورت کے مطابق آلہ سماعت اور مصنوعی اعضاء بھی مفت دئیے جائیں گے۔
