مریم نواز نے خصوصی افراد کیلئے معاون آلات کے منصوبے کا افتتاح کر دیا

لاہور: (دنیا نیوز) وزیراعلیٰ مریم نواز شریف نے سپیشل افراد کے لئے معاون آلات کے پنجاب کی تاریخ کے سب سے بڑے پراجیکٹ کا افتتاح کر دیا۔

وزیراعلیٰ مریم نواز شریف حادثاتی طور پر بازو سے محروم عقیل کو سٹیج پر خود لائیں، دماغ سے خود کارسگنل لے کر حرکت کرنے والے بازو کی تنصیب سے سہیل نے پہلی مرتبہ ہاتھ کو حرکت دی۔

ننھے سہیل نے وزیراعلیٰ مریم نواز سے ہائی فائی بھی کیا، وزیراعلیٰ مریم نواز شریف نے خود کار وہیل چیئر، پیڈز ٹرائی وہیل سکوٹی اور دیگر معاون آلات دیئے اور ان کی حوصلہ افزائی کی۔

تقریب میں پنجاب بھر سے 300 سے زائد سپشل افراد نے شرکت کی، صوبہ بھر میں سپیشل افراد کو ایک ارب کے مصنوعی اعضا، آلہ سماعت، وہیل چیئر اور دیگر آلات مفت دیئے جائیں گے۔

سپیشل افراد کو مینوئل وہیل چیئر، رولیٹر، ٹرائی سائیکل، الیکٹرک اور موٹرائزڈ وہیل چیئر دی جائیں گی، ٹرائی موٹر سائیکل، واکنگ واکر، فریم موبائل ٹائلٹ چیئر، پیڈز وہیل چیئر، کنٹرولڈ وہیل چیئر بھی دی جائے گی۔

سپیشل افراد کو ضرورت کے مطابق آلہ سماعت اور مصنوعی اعضاء بھی مفت دیئے جائیں گے، تقریب میں آمد پر دو پیاری خاص بچیوں عائزہ اور عائشہ نے وزیراعلیٰ مریم نواز کا خیر مقدم کیا اور گلدستے پیش کئے۔

وزیراعلیٰ مریم نواز شریف تقریب میں سپیشل افراد کے درمیان بیٹھ گئیں، وزیراعلیٰ مریم نواز شریف نے ننھی بچی کو ساتھ بٹھا لیا اور پیار کیا۔

قوت گویائی سے محروم بچوں نے تقریب میں قومی ترانے، ترجمہ تلاوت کو اشاروں کی زبان میں بیان کیا، صوبائی وزیر سہیل شوکت بٹ نے تقریب سے خطاب میں پراجیکٹ کی تفصیلات سے آگاہ کیا۔