رانی پور: (دنیا نیوز) مہران ہائی وے پر 2 مسافر بسیں آپس میں ٹکرانے سے خاتون کنڈیکٹر جاں بحق ہوگئی۔
پولیس حکام کے مطابق رانی پور میں مہران ہائی وے پر دو بسوں میں تصادم ہوا جس کے نتیجے میں خاتون کنڈیکٹر زندگی کی بازی ہار گئی جبکہ 40 مسافر زخمی ہوئے ہیں، زخمیوں میں خواتین بھی شامل ہیں، 4 کی حالت تشویشناک بتائی جاتی ہے۔
حکام کا کہنا ہے کہ زخمیوں کو گمبٹ گمس ہسپتال منتقل کر دیا گیا، حادثہ تیز رفتاری کے باعث پیش آیا۔
پولیس کے مطابق ابتدائی رپورٹ کے مطابق حادثہ پشاور سے آنیوالی اور کراچی سے راولپنڈی جانے والی بسوں کی درمیان پیش آیا۔
علاوہ ازیں شجاع آباد میں بستی داد انٹر چینج کے قریب تیز رفتار کار حفاظتی دیوار سے ٹکرا گئی جس کے نتیجے میں خاتون سمیت 2 افراد جاں بحق جبکہ دو زخمی ہوگئے، کار سوار ظاہر پیر سے ملتان جا رہے تھے، نعشوں اور زخمیوں کو تحصیل ہیڈ کوارٹر ہسپتال منتقل کر دیا گیا ہے۔
