کراچی: (دنیا نیوز) کراچی میں تیز رفتار آئل ٹینکر نے موٹرسائیکل سوار کو کچل دیا، مشتعل افراد نے آئل ٹینکر جلا دیا۔
واقعہ کورنگی صنعتی ایریا گودام چورنگی کے قریب پیش آیا، واقعے میں زخمی ہونے والے شہری 30 سالہ ریاض کو ہسپتال منتقل کردیا گیا جبکہ پولیس نے آئل ٹینکر کے ڈرائیور کو گرفتار کرکے ٹینکر بھی تحویل میں لے لیا۔
ٹینکر میں آتشزدگی کی اطلاع پر پولیس جائے وقوعہ پر پہنچی اور فائر برگیڈ کو بھی طلب کیا گیا جس پر فائر برگیڈ کی ایک گاڑی نے جائے وقوعہ پر پہنچ کر آگ پر قابو پایا جبکہ ٹینکر ڈرائیور نے پولیس کو جھوٹا بیان دیا کہ آگ شارٹ سرکٹ کے باعث لگی ہے، تاہم پولیس نے مزید تفتیش کی تو ٹینکر ڈرائیور نے اپنا بیان تبدیل کرلیا۔
پولیس حکام کے مطابق ٹینکر ڈرائیور نے بیان تبدیل کرتے ہوئے بتایا کہ ٹینکر سے موٹر سائیکل کو ٹکر لگی جس کے نتیجے میں موٹر سائیکل سوار شخص زخمی ہوا جس کے بعد مشتعل افراد نے ٹینکر کو آگ لگادی اور موقع سے سے فرار ہوگئے۔
