اسلام آباد: (ویب ڈیسک) صدر ڈاکٹر عارف علوی سے عوامی جمہوریہ چین کے نائب وزیر خارجہ سن ویڈونگ نے ملاقات کی، ملاقات میں مختلف شعبوں میں تعاون بڑھانے کی خواہش کا اعادہ کیا گیا۔
صدر مملکت ڈاکٹر عارف علوی نے چین کے نائب وزیر خارجہ سن ویڈونگ سے ملاقات کے دوران پاکستان اور چین کے باہمی فائدے کے لئے معیشت، انفارمیشن ٹیکنالوجی، زراعت اور انسانی وسائل کی ترقی کے شعبوں میں تعاون بڑھانے کی خواہش کا اعادہ کیا، ملاقات کے موقع پر پاکستان میں چین کے سفیر جیانگ زیڈونگ بھی موجود تھے۔
صدر مملکت نے وفد کا خیرمقدم کرتے ہوئے کہا کہ چین ایک بہت ہی عزیز دوست ہے جس نے ہمیشہ مشکل وقت میں پاکستان کا ساتھ دیا، سی پیک منصوبوں نے پاکستان کی توانائی کی ضروریات کو پورا کرنے اور اقتصادی ترقی میں بھی اہم کردار ادا کیا، پاکستان سی پیک کی اعلیٰ معیار کی ترقی کے لئے پوری طرح پرعزم ہے۔
ڈاکٹر عارف علوی نے مزید کہا کہ سی پیک کے اگلے مرحلے میں چین کا تعاون پاکستان کی صنعتی ترقی کے لئے اہم ہو گا، دونوں دوست ممالک کے درمیان اقتصادی تعاون دوطرفہ تعلقات کو مزید مستحکم کرے گا۔
صدر مملکت نے کہا کہ پاکستان اپنی سماجی و اقتصادی ترقی کے لئے آئی ٹی، تعلیم، صحت، زراعت اور غربت کے خاتمے کے شعبوں میں چینی تجربات سے استفادہ کرنا چاہتا ہے، پاکستان اور چین مختلف علاقائی اور بین الاقوامی معاملات پر ایک جیسے خیالات رکھتے ہیں اور مختلف فورمز پر تعاون کرتے ہیں۔
