رحیم یار خان: (دنیا نیوز) نگران وزیراعلیٰ پنجاب پولیس کے جوانوں کا حوصلہ بڑھانے کچے کے علاقے پہنچ گئے، محسن نقوی نے کچے کے علاقے میں اگلے مورچوں کا دورہ بھی کیا۔
نگران وزیراعلیٰ پنجاب محسن نقوی نے کچے کے علاقے میں دہشت گردوں کے خلاف جاری آپریشن کا جائزہ لیا اور آپریشن میں حصہ لینے والے پولیس افسروں اور جوانوں سے ملاقات کی۔
محسن نقوی نے پولیس جوانوں کے حوصلے اور جذبے کو سراہا اور انہیں عید کی مبارکباد اور عیدی دی، محسن نقوی اور انسپکٹر جنرل پولیس ڈاکٹر عثمان انور نے پولیس جوانوں کے ساتھ مل کر پاکستان زندہ باد، پنجاب پولیس زندہ باد کے نعرے بھی لگائے۔
یہ بھی پڑھیں: کچہ رجوانی میں دہشتگردوں اور جرائم پیشہ عناصر کا پولیس پر راکٹ لانچروں سے حملہ
اس موقع پر نگران وزیر اطلاعات عامر میر، چیف سیکرٹری زاہد اختر زمان، آئی جی پنجاب اور ایڈیشنل چیف سیکرٹری داخلہ نگران وزیراعلیٰ کے ہمراہ تھے، ایڈیشنل آئی جی سی ٹی ڈی، ایڈیشنل آئی جی سپیشل برانچ، سیکرٹری تعمیرات ومواصلات، قانون نافذ کرنے والے اداروں کے اعلیٰ حکام اور متعلقہ افسران بھی دورے پر محسن نقوی کے ہمراہ موجود تھے۔
نگران وزیراعلیٰ محسن نقوی کا کہنا تھا کہ کچے کے علاقے میں پولیس کو ڈاکوؤں کے خلاف آپریشن کے دوران نمایاں کامیابیاں حاصل ہوئی ہیں، پنجاب پولیس کے بہادر افسروں اور جوانوں پر فخر ہے، کچے کے علاقے میں امن بحال کرنے کیلئے آخری حد تک جائیں گے۔
نگران وزیراعلیٰ پنجاب کا مزید کہنا تھا کہ دہشت گردوں کے ٹھکانے ختم کر کے مستقل انفراسٹرکچر قائم کیا جائے گا، ان عناصر کو کچے کے علاقے میں دوبارہ پنپنے نہیں دیں گے۔
