اسلام آباد: (ویب ڈیسک) وفاقی وزیر تعلیم رانا تنویر حسین نے کہا ہے کہ قومی نصاب کونسل ملک کے ہر بچے کے لیے مساوی، موثر اور اعلیٰ معیار کی تعلیم کو یقینی بنانے میں اہم کردار ادا کر رہی ہے۔
قومی نصاب کونسل کی کاوش سے جامع، تازہ ترین اور متعلقہ نصاب کا ڈیزائن طالب علموں کو اعلیٰ اور معیاری تعلیم فراہم کرتا ہے جو انہیں جدید دنیا کے چیلنجوں کے لیے تیار کر تا ہے، دور جدید میں شمولیت اور جدت کے اصولوں پر مبنی نویں سے بارہویں جماعت کے نصاب کے مسوّدے میں آئین پاکستان ا ور کوڈنگ پر مبنی مواد بھی شامل کیا گیا ہے۔
قومی نصاب کونسل سیکرٹریٹ کے ہنگامی دورہ کے دوران گفتگو کرتے ہوئے رانا تنویر حسین نے کہا کہ اس نصاب کی تیاری میں اس بات کا خیال رکھا گیا ہے کہ خود سے باخبر رہنے اور دانشورانہ طور پر باصلاحیت شہریوں کی اگلی نسل کو تشکیل دینے میں مدد مل سکے۔
یہ بھی پڑھیں: پی ٹی آئی کا دور حکومت معاشی بدحالی، ہمارا ایک سال کامیابی کا سال ہے، مریم اورنگزیب
قومی نصاب کونسل سیکرٹریٹ میں نویں سے بارہویں جماعت تک تعلیمی نصاب کی تکمیل کے حوالے سے بین الصوبائی ورکشاپ جاری ہے جس میں پاکستان کی تمام اکائیوں سے تعلق رکھنے والے ماہرین تعلیم کی شرکت کو یقینی بنا یا گیا ہے۔
راناتنویر حسین نے ورکشاپ میں موجود مضامین کے ماہرین سے ملاقات کی اور نصاب کی تکمیل کے حوالے سے ہدایات دیں، ان کے ساتھ وفاقی سیکرٹری برائے تعلیم و پیشہ ورانہ تربیت وسیم اجمل چودھری، ڈائریکٹر قومی نصاب کونسل سیکرٹریٹ ڈاکٹر مریم چغتائی بھی تھیں جنہوں نے کہا کہ نصاب میں اصلاحات کے لیے مشترکہ نقطہ نظر کو فروغ دینے کے لیے این سی سی سیکرٹریٹ نے ملک بھر سے رائے حاصل کرنے کے لیے متعدد نشستوں کا انعقاد کیا ہے۔
یہ بھی پڑھیں: بغیر اجازت ڈی این اے کرانا بنیادی انسانی حقوق کی خلاف ورزی ہے: سپریم کورٹ
انہوں نے کہا ان نشستوں میں این سی سی سیکرٹریٹ میں ہونے والی بین الصوبائی نصابی ورکشاپس کا انعقاد بھی شامل تھا جن میں پاکستان بھر سے صوبائی نمائندوں کو جمع کیا گیا تاکہ نویں سے بارہویں جماعت کے نصاب کا جائزہ لیا جا سکے۔
