کراچی: (دنیا نیوز) کراچی میں سیوریج کا بوسیدہ نظام اور نالوں میں کچرے کے ڈھیر لگنے کے باعث مصروف سڑکیں اور رہائشی علاقے گندے پانی کا تالاب بن گئے، ضلع وسطی کے علاقے نارتھ ناظم آباد میں گٹر اور نالہ ابلنے کے باوجود بھی متعلقہ بلدیاتی ادارے کچھ نہ کر سکے۔
شہر قائد میں سیوریج کا بوسیدہ نظام شہریوں کیلئے عذاب بن گیا۔ بلدیہ ضلع وسطی، نارتھ ناظم آباد میں گڑ ابلنے اور نالے کچرے سے چوک ہونے کے باعث مصروف سڑکیں اور رہائشی علاقے گندے پانی کا تالاب بن گئے۔
نارتھ ناظم آباد میں آئی بلاک سمیت دیگر علاقوں میں سیوریج مسائل سے شہریوں کی زندگی اجیرن ہوگئی۔ جگہ جگہ کچرے کے ڈھیر بھی تعفن و بیماریاں پھیلنے کا سبب بن رہے ہیں۔
نارتھ ناظم آباد میں بیشتر مقامات پر گڑ ابلنے سے ٹریفک متاثر اور سڑکیں بھی تباہ ہو رہی ہیں۔ گندگی سے مچھروں اور مکھیوں کی بہتات اور بیماریاں پھیل رہی ہیں۔
