لاہور:(دنیا نیوز)پنجاب اسمبلی میں اپوزیشن لیڈر حمزہ شہباز نے کہاہے کہ ساڑھے تین سالہ بدانتظامی ، مہنگائی ، کرپشن اور سبز باغوں کا بدلہ عوام نے خیبر پختونخوا کے بلدیاتی انتخابات میں اپنے ووٹ کی طاقت سے لینے کا آغاز کر دیا ہے۔
خیبرپختونخوا بلدیاتی انتخابات کے نتائج پر اپنے ردعمل میں حمز ہ شہباز نے کہاکہ پی ٹی آئی اپنے گڑھ پشاور کے میئر کی نشست ہارنے کو اگلے انتخابات کا نوشتہ دیوار سمجھے ۔
انہوں نے مزید کہا کہ اس نا اہل حکومت نے ملک کو دیوالیہ کرکے چھوڑا ہے ،اب تو ان کے اپنے بھی اس سچ کو چھپا نہیں پا رہے۔
حمزہ شہباز شریف کا کہنا تھا کہ عوام اس عذاب سے جلد از جلد چھٹکارا چاہتے ہیں جس کا ایک اظہار بلدیاتی انتخابات کے نتائج کر رہے ہیں۔ صاف شفاف الیکشن ہوں تو اس جماعت کو منہ چھپانے کی جگہ نہ ملے۔
