لاہور: (دنیا نیوز) وزیر ریلوے شیخ رشید نے رائل پام کلب سے متعلق سپریم کورٹ کے فیصلے کو خوش آئند قرار دیتے ہوئے کہا ہے کہ وہ عدلیہ کے شکر گزار ہیں جنہوں نے تاریخی فیصلہ دیا۔ انہوں نے کہاوہ قوم سے وعدہ کرتے ہیں ریلوے کو خسارے سے نکالیں گے۔
دنیا نیوز ذرائع کے مطابق رائل پام کنٹری کلب کا فیصلہ ریلوے کے حق میں آنے پر وفاقی وزیر شیخ رشید خوشی سے نہال ہو گئے۔ وزیراعظم سے خصوصی ملاقات میں انھیں فیصلے کی تفصیلات سے آگاہ کیا۔
ذرائع کے مطابق شیخ رشید نے وزیراعظم اور کابینہ ارکان کو مٹھائی بھی کھلائی۔ ان کا کہنا تھا کہ ریلوے کا خسارہ دور ہونے میں مدد ملے گی۔ وزیراعظم نے ان سے پوچھا کہ اب رائل پام کنٹری کلب کو کون چلائے گا؟اس پر شیخ رشید کا کہنا تھا کہ اب انٹرنیشنل ٹینڈر ہوگا، عالمی سطح کی کمپنی چلائے گی۔
خیال رہے کہ سپریم کورٹ نے رائل پام گالف اینڈ کنٹری کلب پاکستان ریلوے کے حوالے کرنے کا حکم دیتے ہوئے ہدایت کی ہے کہ تین ماہ میں نئی انتظامیہ سے متعلق بھی قواعد وضوابط طے کیے جائیں گے۔
