حیدر آباد (دنیا نیوز) پاکستان تحریک انصاف کے سنئیر رہنما ڈاکٹر عارف علوی نے پاکستان مسلم لیگ نواز کے رہنما اور سابق وزیر داخلہ چودھری نثار کو پارٹی میں شمولیت کی دعوت دیدی۔

حیدرآباد میں میڈیا سے گفتگو کرتے ہوئے عارف علوی کا کہنا تھا کہ میں چوہدری نثار کو پارٹی میں آنے کی دعوت دیتا ہوں۔ چوہدری نثار اچھے آدمی ہیں برے لوگوں میں پھنسے ہوئے ہیں۔ ن لیگ اس لیے گھر کی لونڈی بنی ہے کیونکہ انہوں نے متنازع قانون بنائے۔

انہوں نے کہا کہ ن لیگ اور پاکستان پیپلز پارٹی کو صحیح ڈر ہے کہ اگلی حکومت ان کی نہیں ہوگی۔ عارف علوی نے دعویٰ کیا کہ اگلی حکومت تحریک انصاف بنائیگی۔ ن لیگی رہنمائوں کی جانب سے عدلیہ مخالف بیانات سے متعلق سوال کے جواب میں پی ٹی آئی رہنما بتایا کہ اگر حکومت کچھ نہیں کرگی تو عدالتیں ہی کام کرینگی۔

نثار شہباز ملاقات 

وزیراعلیٰ پنجاب شہباز شریف سے سابق وزیر داخلہ چودھری نثار نے لاہور میں ملاقات کی اور ملکی سیاسی صورتحال پر تبادلہ خیال کیا۔  ملاقات میں ملکی سیاسی صورتحال پر تبادلہ خیال کیا گیا۔ ذرائع کے مطابق دونوں رہنماوں کی ملاقات 45 منٹ جاری رہی۔ 

چودھری نثار کا کہنا تھا اداروں کے درمیان محاذ آرائی نہیں ہونی چاہیے، یہ کسی صورت بھی جمہوریت اور ملکی استحاکم کیلئے سود مند نہیں ہوگی۔ شہباز شریف کا کہنا تھاکہ مسلم لیگ ن نے ہمیشہ اداروں کی مصالحت کی بات کی ہے اور اسی پالیسی پر گامزن رہے گی لیکن ہر ادارے کو اپنی حدود میں رہ کر ہی کام کرنا چاہیے۔

یہ بھی پڑھیں: مریم نواز کی تیز زبان سے پارٹی بند گلی میں جا رہی ہے، چودھری نثار

یاد رہے کہ چوہدری نثار اور اعلیٰ قیادت میں اختلافات کھل کر سامنے آگئے ہیں جن کا اظہار سابق وزیر داخلہ اپنی پریس کانفرنس میں کئی بار کر چکے ہیں۔ گزشتہ روز نجی نیوز چینل کو انٹرویو دیتے ہوئے چوہدری نثار علی خان نے کہا نواز شریف سے پہلے والا رابطہ نہیں، ن لیگ سے رشتہ قائم رکھنا چاہتا ہوں، آئندہ ہفتے فیصلہ کروں گا کہ الیکشن کس پلیٹ فارم سے لڑنا ہے۔

سابق وزیر داخلہ کا کہنا تھا کہ نون لیگ کو گھر کی لونڈی بنایا گیا تو شاید رشتہ نہ رہے۔ چیف جسٹس اور وزیراعظم کی ملاقات کے حوالے سے بات کرتے ہوئے ان کا کہنا تھا کہ اس کا مقصد اداروں میں نرمی پیدا کرنا تھا۔ ابہام دور نہیں ہوا، خدشہ ہے شہبازشریف کو کام کا مینڈیٹ نہیں ملے گا۔