لاہور:(دنیا نیوز) وزیراعلیٰ پنجاب مریم نواز شریف نے فلمی صنعت کی بحالی کے لیے بڑا اقدام اٹھاتے ہوئے فلم سازی کے ضمن میں امدادی رقوم کی فراہمی کے لیے 8 رکنی کمیٹی تشکیل دیدی۔
وزیر اعلیٰ مریم نواز شریف نے پنجاب کے پہلے فلم سٹی، فلم سٹوڈیو، پوسٹ پروڈکشن لیب اور پاکستان کے پہلے فلم سکول کے قیام کی بھی منظوری دی، نوازشریف آئی ٹی سٹی میں فلم سٹی، فلم سٹوڈیو، پوسٹ پروڈکشن لیب کے لیے جگہ مختص کر دی گئی ہے، ڈیزائن سمیت دیگر اقدامات پر پیش رفت کا پہلا جائزہ بھی مکمل کر لیا گیا۔
پنجاب کابینہ کی منظوری کے بعد "پنجاب فلم فنڈ ڈسبرسمنٹ کمیٹی" تشکیل دی گئی، سینئروزیر مریم اورنگزیب کنوینئر ہوں گی، جس کا نوٹیفکیشن بھی جاری کر دیا گیا، کمیٹی رواں مالی سال میں پنجاب کی فلم انڈسٹری کے فروغ کے لیے فلم سازوں کو گرانٹ جاری کرے گی۔
وزیر اطلاعات عظمیٰ بخاری، وزیرخزانہ مجتبیٰ شجاع الرحمٰن، وزیر انسانی حقوق و اقلیتی امور سردار رمیش سنگھ اروڑا بھی کمیٹی کے اراکین میں شامل ہیں، صوبائی سیکرٹری اطلاعات طاہر رضا ہمدانی، سیکرٹری منصوبہ بندی آصف طفیل، سیکرٹری خزانہ مجاہد شیر دل، سیکرٹری سیاحت فرید احمد تارڑ بھی کمیٹی کا حصہ ہونگے۔
نوٹیفکیشن کے مطابق کمیٹی فلم سازوں اور فلم ساز کمپنیوں کی درخواستوں کا جائزہ لے گی، کمیٹی نئی فلموں کی تیاری اور نامکمل فلموں کے سکرپٹس کا بھی جائزہ لے گی، کمیٹی فنڈ کے انتظام، اہلیت کے معیارات اور باکس آفس مراعات سے متعلق امور پر فیصلہ کرے گی، کمیٹی کو کسی معاملے پر ذیلی کمیٹیاں تشکیل دینے کا اختیار بھی حاصل ہوگا۔
سینئر وزیر مریم اورنگزیب کی صدارت میں کمیٹی کا پہلا اجلاس بھی منعقد ہوا، جس میں وزیراعلیٰ کے وژن پر عملدرآمد کے لئے اہم فیصلے کیے گئے۔
