قاہرہ : (ویب ڈیسک ) امریکی وزیرِ خارجہ انٹونی بلنکن کا کہنا ہے امریکا نے اقوامِ متحدہ کی سلامتی کونسل میں غزہ کی پٹی میں یرغمالیوں کی رہائی سے منسلک فوری جنگ بندی کی قرارداد کا مسودہ جمع کروایا ہے۔
خبر رساں ادارے ‘ کی رپورٹ کے مطابق بدھ کی شام سعودی میڈیا آؤٹ لیٹ کو انٹرویو دیتے ہوئے انٹونی بلنکن نے بتایا کہ ہم نے درحقیقت اقوام متحدہ کی سلامتی کونسل کے سامنے ایک قرارداد پیش کی ہے جس میں یرغمالیوں کی رہائی کے لیے فوری جنگ بندی کا مطالبہ کیا گیا ہے، اور ہمیں پوری امید ہے کہ دیگر ممالک اس کی حمایت کریں گے۔
واضح رہے کہ امریکا حماس و اسرائیل تنازع پر اقوامِ متحدہ کی سلامتی کونسل کی گزشتہ قرا ردادوں کو ویٹو کر چکا ہے۔
تاہم، حالیہ ہفتوں میں واشنگٹن نے اپنے اتحادی پر دباؤ بڑھاتے ہوئے اس بات پر اصرار کیا ہے کہ حماس کو 7 اکتوبر کو اسرائیل پر اپنے حملوں کے دوران پکڑے گئے یرغمالیوں کو فوری طور پر رہا کرنا چاہیے۔
یہ بھی پڑھیں:غزہ میں جنگ بندی کے معاہدے تک پہنچنے کے قریب ہیں : بلنکن
عرب میڈیا کو انٹرویو میں انہوں نے کہا کہ غزہ میں جنگ بندی کے معاہدے تک پہنچنے کے قریب ہیں، رفح میں بڑے پیمانے پر اسرائیلی زمینی آپریشن کی حمایت نہیں کرتے۔
واضح رہے کہ امریکی وزیر خارجہ ایسے وقت پر مشرق وسطیٰ کا دورہ کر رہے ہیں جب دوسری طرف قطر میں ثالثوں کے درمیان مذاکرات جاری ہیں۔
مشرقِ وسطیٰ کے دورے کے دوران امریکی وزیرِخارجہ انٹونی بلنکن غزہ جنگ بندی کے معاملے پر علاقائی وزرائے خارجہ سے ملاقات کریں گے، امریکی وزیرِخارجہ انٹونی بلنکن غزہ میں جنگ بندی کے معاہدے سے متعلق پُرامید ہیں۔
