کیلیفورنیا: (ویب ڈیسک) سوشل شیئرنگ ایپلی کیشن انسٹاگرام پر ڈس لائیک بٹن کی آزمائش شروع کر دی گئی اور محدود صارفین کو اس تک رسائی بھی دی گئی ہے۔
ٹیکنالوجی ویب سائٹ کے مطابق مذکورہ بٹن کے تحت صارفین اب کسی بھی صارف کی جانب سے شیئر کی جانے والی پوسٹ یا ویڈیو کو ڈس لائیک نہیں کر سکیں گے بلکہ وہ مذکورہ پوسٹ یا ویڈیو پر کئے جانے والے کمنٹس کو ڈس لائیک کر سکیں گے۔
مذکورہ فیچر ویڈیوز اور پوسٹس تمام پر نظر آئے گا اور ابتدائی طور پر ڈس لائیک کے بٹن کو صرف کمنٹس تک محدود رکھے جانے کا امکان ہے۔
رپورٹ کے مطابق ڈس لائیک کے بٹن کو خفیہ رکھا گیا ہے اور دوسرے لوگ ڈس لائیک کو نہیں دیکھ سکیں گے، تاہم کمنٹس کرنے والے صارف اور پوسٹ کرنے والے صارف کو اس تک رسائی دی جائے گی۔
علاوہ ازیں ڈس لائیک کرنے والے صارف کا یوزر نیم بھی واضح نہیں ہوگا، اس لئے مذکورہ بٹن کو بہترین قرار دیا جا رہا ہے۔
انسٹاگرام کے سربراہ نے اسی حوالے سے تھریڈ پوسٹ میں تصدیق کی کہ ڈس لائیک بٹن کی آزمائش جاری ہے اور آنے والے وقتوں میں اس تک مزید صارفین کو رسائی دی جائے گی۔
انہوں نے ڈس لائیک بٹن کے حوالے سے مزید بتایا کہ مذکورہ فیچر کا مقصد ان افراد کو پیغام دینا ہے کہ ان کا کمنٹ دوسروں کو پسند نہیں آیا اور یہ کہ اس سے ماحول کو مزید بہتر بنانے کا موقع ملے گا۔
