لاہور: (دنیا نیوز) وزیراعظم کے مشیر برائے سیاسی امور رانا ثناء اللہ نے کہا ہے کہ سندھ کے حصے کا ایک قطرہ بھی پانی چوری کرنے کا ہمارا کوئی ارادہ نہیں۔
نجی ٹی وی کے پروگرام میں گفتگو کرتے ہوئے لیگی رہنما رانا ثناء اللہ نے کہا کہ سندھ حکومت بات کرنے کو تیار ہے، یہ بات وزیرِاعظم کے نوٹس میں لائی گئی ہے، شہباز شریف اس معاملے پر مناسب فیصلہ کریں گے۔
انہوں نے کہا کہ بلاول بھٹو نے جلسہ عام سے جو بات کی وہ جوش خطابت میں کی، جوش خطابت میں بہت ساری باتیں ہو جاتی ہیں، بلاول نے جو کچھ کہا اس پر رد عمل دینے کی ضرورت نہیں، بیانات ایک دائرے میں ہونے چاہئیں، دوسروں کی عزت و احترام ہونا چاہیے، پیپلز پارٹی بات کرنے کو تیار ہے، وزیراعظم طریقہ کار واضح کریں گے۔
ان کا کہنا تھا کہ پی ٹی آئی کو چاہیے کہ اپنے معاملات کو بہتر کرے، جیل کے عملے سے تعاون کرے، یہ جیل جا کر ایسا ماحول پیدا کرتے ہیں، جن لوگوں کا نام فہرست میں ہے وہی ملاقات کیلئے جائیں، دیگر لوگ کیوں چلے جاتے ہیں؟
رانا ثناء اللہ نے کہا کہ دونوں اطراف ہی معاملات کو بہتر کرنے کی ضرورت ہے، ہماری اپنی بھی خواہش ہے بانی پی ٹی آئی سے ان کی بہنوں کی ملاقات بلاروک ٹوک کرائی جائے۔
