اسلام آباد: (ویب ڈیسک) چیئرمین سینیٹ سید یوسف رضا گیلانی نے کہا ہے کہ معراج کا واقعہ ہمیں اتحاد، ایمان، اور محبت کے پیغام کو عام کرنے کی دعوت دیتا ہے۔
چیئرمین سینیٹ یوسف رضا گیلانی نے شبِ معراج النبیﷺ کے بابرکت موقع پر خصوصی پیغام میں کہا کہ شبِ معراج النبیﷺ وہ عظیم اور مقدس رات ہے جب اللہ رب العزت نے اپنے محبوب نبی آخرالزماں حضرت محمد مصطفیٰﷺ کو معراج کی عظیم سعادت سے نوازا۔
انہوں نے کہا کہ یہ رات اللہ کی قدرت، اس کی قربت اور انسانیت کے لئے رہنمائی کا ایسا پیغام ہے جو رہتی دنیا تک زندہ رہے گا، اس رات ہمیں سبق ملتا ہے کہ اللہ کا قرب اور کامیابی صرف عبادت، اخلاق اور اعمالِ صالحہ کے ذریعے ممکن ہے۔
چیئرمین سینیٹ نے کہا کہ یہ رات ہمیں یہ یاد دلاتی ہے کہ اللہ تعالیٰ نے اپنے حبیبﷺ کو ناصرف تمام جہانوں کی سیر کرائی بلکہ امتِ مسلمہ کے لئے نماز کا تحفہ دیا جو اللہ سے قربت کا بہترین ذریعہ ہے۔
سید یوسف رضا گیلانی نے اپنے پیغام میں کہا کہ آئیں اس مقدس رات پر ہم سب عہد کریں کہ نبی کریمﷺ کی تعلیمات کو اپنی زندگیوں میں نافذ کریں گے اور اپنے کردار سے اسلام کے امن، محبت اور بھائی چارے کے پیغام کو فروغ دیں گے۔
