کراچی: (دنیا نیوز) پاک بحریہ کی سالانہ فلِیٹ ایفیشنسی پریڈ کا انعقاد شہر قائد کراچی میں ہوا جس میں چیف آف دی نیول سٹاف ایڈمرل نوید اشرف بطور مہمانِ خصوصی شریک ہوئے۔
ترجمان پاک بحریہ کے مطابق نیول چیف نے پاکستان نیوی فلِیٹ کی آپریشنل تیاریوں پر اطمینان کا اظہار کیا اور کہا کہ خطے میں ابھرتے ہوئے میری ٹائم سکیورٹی چیلنجز سے نمٹنے کیلئے پاک بحریہ کو ہمیشہ چوکس رہنے کی ضرورت ہے۔
انہوں نے کہا پاک بحریہ کی آپریشنل صلاحیتوں میں مزید اضافے کیلئے جدید پلیٹ فارمز بحری بیڑے میں شامل کیے جا رہے ہیں۔
ترجمان نے مزید بتایا کہ سربراہ پاک بحریہ نے مقررہ اہداف کے کامیابی سے حصول پر فلِیٹ یونٹس اور افسران کے جذبے کو سراہا، انہوں نے بہترین کارکردگی کا مظاہرہ کرنے والے یونٹس کو اعزازی شیلڈز سے بھی نوازا۔
