لاہور: (دنیا نیوز) وزیراعلیٰ پنجاب محسن نقوی نے کنٹرولڈ ایکسس کوریڈور بند روڈ کے دونوں پیکجز کا 2 گھنٹے تک دورہ کیا۔
اس دوران انہوں نے سگیاں سے نیازی چوک اور بابو صابو سے سگیاں تک پورے روٹ کا تفصیلی معائنہ کیا، وزیراعلیٰ نے دونوں پیکجز پر جاری تعمیراتی سرگرمیوں کا جائزہ لیا اور پیکج ون کی سائیڈ والز کی تعمیر اور کنکریٹ ڈالنے کے کام کا مشاہدہ بھی کیا، سائیڈ والز پر پتھر کے چوکھٹے رکھنے کے عمل کا جائزہ لیا، انہوں نے پیکج ون پر کام کی رفتار پر اطمینان کا اظہار کیا۔
وزیراعلیٰ محسن نقوی کو پراجیکٹ پر ہونے والی پیشرفت کے بارے میں بریفنگ دی گئی، بریفنگ میں بتایا گیا منصوبے کے پیکج ٹو بابو صابو تا سگیاں کا مجموعی طور پر 24 فیصد جبکہ پیکج ون سگیاں تا نیازی چوک کا 40 فیصد کام مکمل کر لیا گیا۔
بریفنگ میں مزید بتایا گیا پیکج ون کے 34 میں سے 33 گرڈرز، پیکج ٹو کے 51 میں 38 گرڈرز تیار ہوگئے بقیہ پر کام جاری ہے، پیکج ون کے 3100 پینلز انسٹال، پیکج ٹو کے 551 انسٹال جبکہ 1900 پینلز تیار ہیں، دونوں پیکجز سے منسلک 9 سب ویز پر بھی بیک وقت کام جاری ہے، منصوبے پر چوبیس گھنٹے پوری رفتار سے کام ہو رہا ہے۔
اس موقع پر محسن نقوی نے کہا پیکج 2 پر کام کو تیز کیا جائے، منصوبے کی اطراف سڑکوں پر تجاوزات کا فوری خاتمہ کیا جائے۔
صوبائی وزراء عامر میر، اظفر علی ناصر، سیکرٹری ہاؤسنگ، کمشنر لاہور ڈویژن و ڈی جی ایل ڈی اے، ڈپٹی کمشنر، ایم ڈی واسا اور متعلقہ حکام بھی اس موقع پر موجود تھے۔
