کراچی: (دنیا نیوز) گورنر سندھ کامران ٹیسوری نے کراچی میں سیف سٹی منصوبہ جلد مکمل کرنے پر زور دیا ہے۔
کراچی میں گورنر سندھ سحری کرنے سمن آباد فوڈ سٹریٹ پہنچے جہاں انہوں نے سحری عوام کے ساتھ کی اور لوگوں میں گھل مل گئے۔
اس موقع پر میڈیا سے گفتگو کرتے ہوئے کامران ٹیسوری کا کہنا تھا لوگ پورے کراچی میں اب مجھے دعوت دیتے ہیں، گھر میں بیٹھ کر مسائل کو حل نہیں کیا جا سکتا ، لوگ ووٹ لے کر اقتدار تو لے لیتے ہیں لیکن کام کوئی نہیں کرتا۔
14 ویں سحری سمن آباد میں عوام کے ساتھ ،کل سے عوام میں سحری تقسیم کروں گا،سیف سٹی پروجیکٹ کو جلد از جلد مکمل کرنے کے لئے وزیراعلی کو خط لکھوں گا pic.twitter.com/oHOmg1heen
— Kamran Tessori (@KamranTessoriPk) April 5, 2023
ان کا مزید کہنا تھا کہ اس شہر کے کاروبار پر خاص توجہ دینا ہے، جس نے بڑے دعوے اور وعدے کیے وہ ملک کا وزیراعظم بنا، ایک کروڑ نوکری کا وعدہ کیا لیکن عمل نہیں کرسکا۔
گورنر سندھ نے کہا کہ گیس لوڈشیڈنگ سحر و افطار میں بند کی جائے، ایم ڈی سوئی گیس سے میری بات چیت ہوچکی ہے، ایک دن بعد ملاقات میں حتمی اقدامات کریں گے۔
کامران ٹیسوری نے مزید کہا کہ 34 قتل کے بعد ایس ایچ او نہیں بلکہ پولیس چیف بدل جانا چاہیے، صوبے کا آئی جی یہ کہے کہ 5000 اہلکاروں کی کمی ہے، سکیورٹی کیمرہ نہیں ہیں تو میں بھی خاموش ہوجاتا ہوں، یہ حکومت کے کام ہیں۔
گورنر سندھ کامران ٹیسوری نے اس موقع پر شہر میں مستحق لوگوں کے گھر جا کر سحری بانٹے کا اعلان بھی کیا۔
