کوئٹہ:(دنیا نیوز) بارشیں اور سیلاب سے بلوچستان میں حالات خراب، ہر طرف تباہی، سیکڑوں مکانات زمین بوس ہوگئے، متاثرین کھلے آسمان تلے زندگی بسر کرنے پر مجبور ہیں، پاک فوج کی امدادی سرگرمیاں بھی جاری ہیں۔
تفصیلات کے مطابق بلوچستان میں سیلاب سے تباہی پھیل گئی، جاں بحق افراد کی تعداد 127 ہوگئی، سیکڑوں مکانات زمین بوس ہو گئے اور 565 کلومیٹر شاہراہوں کو نقصان پہنچا، گیارہ پل سیلابی ریلوں کی نذر ہو گئے، متاثرہ علاقوں میں پاک آرمی اور فضائیہ کا ریلیف آپریشن جاری ہے۔
سیلاب سے پانچ سو پینسٹھ کلومیٹر شاہراہوں کو نقصان پہنچا، گیارہ پل سیلابی ریلوں کی نذر ہوگئے، کراچی کوئٹہ شاہراہ پر متبادل اور عارضی راستوں کا قیام عمل میں لایا گیا۔
دوسری جانب راجن پور میں طوفانی بارشوں سے بڑے پیمانے پر تباہی پھیل گئی، 75 سے زائد آبادیاں متاثر ہوئیں، ہزاروں ایکڑ پر فصلیں خراب ہوگئیں، متاثرین کیلئے پاک فوج کا فری میڈیکل کیمپ فعال کردیا گیا، تونسہ شریف کی بستی چھتانی، بستی احمدانی، زندہ پیر موڑ میں سیلابی صورتحال برقرار ہے، لوگوں کی محفوظ مقامات پر منتقلی اور امدادی کارروائیاں جاری ہیں۔
ادھر سیلاب کی تباہ کاریاں جاری ہیں، سکھر بیراج کے مقام پر دریائے سندھ سے مزید چار لاشیں برآمد ہونے کے بعد مجموعی تعداد انیس تک پہنچ گئی، اوکاڑہ میں چھت گرنے سے دو افراد جاں بحق ہوگئے، اسلام آباد، لاہور اور دیگر شہروں میں بادلوں کے ڈیرے، وقفے وقفے سے بارش جاری۔
پاک فوج کی سیلاب سے متاثرہ علاقوں میں امدادی سرگرمیاں، راشن اور کھانا تقسیم
پاک فوج اور ایف سی کی جانب سے ملک کے مختلف سیلاب زدہ علاقوں میں فلڈ ریلیف سرگرمیاں جاری ہیں، پاک آرمی کے دستے طبی امداد فراہم کرنے اور مواصلاتی ڈھانچے کو کھولنے کے علاوہ ریسکیو، امدادی سرگرمیوں میں مصروف ہیں۔
پاک فوج کے شعبہ تعلقات عامہ ( آئی ایس پی آر) کے مطابق مردان میں پانی نکالنے کی کوششیں کی گئیں، ضلع مہمند کے مقامی نالوں میں سیلاب کی اطلاع ملی ہے، جنوبی پنجاب میں تمام پہاڑی ندی نالے معمول کے مطابق بہہ رہے ہیں، سوائے مٹھاون، کاہا اور سانگھڑ ہل میں کچھ بڑھے ہوئے بہاؤ کے علاوہ مقامی کمانڈروں نے راجن پور اور ڈی جی خان کا دورہ کیا، جہاں پر سیلاب متاثرین میں امدادی اشیاء تقسیم کی گئیں، دونوں اضلاع میں میڈیکل کیمپ لگائے گئے ہیں۔
آئی ایس پی آر کے مطابق بلوچستان جھل مگسی میں گندھاوا کا مکمل رابطہ بحال کر دیا گیا ہے، گندھاوا اور گردونواح میں کوئی الگ تھلگ علاقہ نہیں، امدادی سرگرمیاں جاری ہیں، آرمی میڈیکل کیمپ میں 115 مریضوں کا علاج کیا گیا، خضدار، M-8 اب بھی منقطع ہے، رابطے کی بحالی پر کام جاری ہے، حافظ آباد میں سی ایم ایچ خضدار اور ایف سی کی جانب سے لگائے گئے فیلڈ میڈیکل کیمپ میں 145 متاثرہ افراد کا علاج کیا گیا، نصیرآباد میں دن بھر بارش نہیں ہوتی، باباکوٹ اور گندھا کی متاثرہ آبادی کے لیے امدادی سرگرمیاں جاری ہیں، سیلاب متاثرین میں راشن اور پکا ہوا کھانا تقسیم کیا گیا، گندکھا میں فیلڈ میڈیکل کیمپ میں مختلف مریضوں کا علاج کیا گیا، چمن میں بارش نہیں ہوئی، باب دوستی مکمل طور پر فعال ہے۔
پاک فوج کے شعبہ تعلقات عامہ کے مطابق نوشکی کے علاقے میں آج بارش نہیں ہوئی، پھنسے ہوئے لوگوں کے لیے امدادی سرگرمیاں جاری ہیں، پکا ہوا کھانا ایک ہزار سے زیادہ لوگوں کو دیا گیا، 3 مقامات پر تباہ ہونے والے N-40 کی مرمت کر کے ٹریفک بحال کر دی گئی ہے، لسبیلہ کے علاقے میں بارش نہیں ہوئی، صورتحال ٹھیک ہو رہی ہے، ناکہ، بیلہ، دودر، حب اور گڈانی میں 5 فیلڈ میڈیکل کیمپ طبی امداد فراہم کر رہے ہیں، N-25 کھول دیا گیا ہے، پلوں کی مرمت کا کام جاری ہے، گوادر میں جنرل آفیسر کمانڈنگ نے حب اور اتھل کا دورہ کیا، MI-17 کی 2 قسمیں چلائی گئیں اور حب اور اتھل میں 1500 کلو راشن کی اشیاء تقسیم کی گئیں۔
قلعہ سیف اللہ کے پورے ضلع قلعہ سیف اللہ میں بارش کی اطلاع ملی، مسلم باغ خزینہ میں لگائے گئے فیلڈ میڈیکل کیمپ میں 200 سے زائد مریضوں کا علاج کیا گیا، گلگت بلتستان قراقرم ہائی وے سکندر آباد کے قریب 2 مٹی کے تودے گرنے کی اطلاع ہے۔
ایف ڈبلیو او کی جانب سے سڑک کو یک طرفہ ٹریفک کے لیے کھول دیا گیا ہے، ملک میں دریاؤں کی صورتحال کی صورتحال کے پیش نظر اٹک، تربیلا، چشمہ ، گڈو کے مقام پر نچلے درجے کا سیلاب ہے ، ورسک کے مقام پر نچلا سیلاب اور دریائے کابل میں نوشہرہ کے مقام پر درمیانے درجے کا سیلاب ہے، باقی تمام دریا معمول کے مطابق بہہ رہے ہیں، خیبر پختونخوا، مردان میں سب سے زیادہ 133 ملی میٹر اور مہمند میں 85 ملی میٹر بارش ریکارڈ کی گئی۔
