اسلام آباد: (دنیا نیوز) وزیراعظم شہباز شریف نے ملک بھر میں موسلادھار بارشوں کے سبب سیلابی صورتحال سے عوام کا تحفظ یقینی بنانے کے لئے صوبائی حکومتوں اور این ڈی ایم اے کو ہدایات جاری کر دیں، کہتے ہیں عوام کے تحفظ اور نقصانات سے حتی الامکان بچاؤ کے لئے بھرپور کوششیں اور وسائل بروئے کار لائے جائیں۔
وزیراعظم نے نیشنل ڈیزاسٹر مینجمنٹ اتھارٹی کو صوبائی حکومتوں اور پی ڈی ایم ایز کے ساتھ اشتراک عمل کا حکم دیتے ہوئے کہا کہ وفاق کی جانب سے صوبائی حکومتوں اور اداروں کی بھرپور مدد کی جائے،خطرے کی زد میں آنے والے علاقوں کے عوام کو محفوظ مقامات پر منتقل کیا جائے،متاثرہ عوام کو عارضی پناہ گاہوں اور خوراک کی فراہمی یقینی بنائی جائےجبکہ ہنگامی طبی امداد اور وبائی امراض سے بچاؤ کے لئے میڈیکل ٹیموں کو متحرک کیا جائے۔ بارشی وسیلابی پانی کے نکاس کے لئے مطلوبہ مشینری اور عملہ متعلقہ مقامات پر پہنچایا جائے، سپرے کروایا جائے تاکہ وباؤں کو روکا جاسکے۔
وزیر اعظم شہباز شریف نے وزیر اعلی سندھ مراد علی شاہ سے بھی رابطہ کیا اور کراچی میں موسلادھار بارشوں سے ہونے والے المناک نقصانات پر گہرے دکھ کا اظہار کیا۔ شہباز شریف نے کہا کہ مجھے یقین ہے کہ سندھ حکومت اس موقع پر اٹھے گی اور وزیراعلیٰ سندھ کی قابل قیادت میں زندگی کو معمول پر لائے گی۔
انہوں نے کہا کہ کراچی سمیت ملک کے دیگر حصوں میں اموات پر بہت دکھ ہے، متاثرین سے اظہار ہمدردی کرتے ہیں۔ این ڈی ایم اے کراچی اور سندھ میں عوام کے تحفظ، ریسکیو اور ریلیف میں صوبائی حکومت اور اداروں کی معاونت کرے ،سیلابی صورتحال میں کرنٹ لگنے جیسے واقعات کے تدارک کے لئے ہنگامی اقدامات کئے جائیں۔
