اسلام آباد : (دنیا نیوز) پنجاب کے 20 حلقوں میں 17 جولائی کو ہونے والے ضمنی انتخاب کے حوالے سے چیف الیکشن کمشنر سکندر سلطان راجا نے افسران کو قواعد وضوابط پر سختی سے عمل پیرا ہونے کی ہدایت کردی۔
الیکشن کمیشن ترجمان کے مطابق چیف الیکشن کمشنر سکندر سلطان راجہ نے ڈسٹرک ریٹرنگ افسران،رٹرننگ افسران اور مانیٹرنگ افسران سے ٹیلوفونک رابطہ کیا اور ہدایات کی کہ وہ 20 حلقوں میں انتخابات کو صاف شفاف اور غیرجانبدارانہ بنانے کی ہر ممکن کوشش کریں۔
انہوں نے کہا کہ اس مقصد کے لیے کسی قسم کا دباؤ خاطر میں نہ لائیں، الیکشن اور پولنگ کے عمل میں رکاوٹ ڈالنے والے عناصر کے خلاف بلا امتیاز قانونی کارروائی کی جائے۔
چیف الیکشن کمشنر کا کہنا تھا کہ ڈسٹرکٹ مانیٹرنگ ٹیمیں صورت حال کی لمحہ بہ لمحہ رپورٹ الیکشن کمیشن بھجوائیں، ڈسٹرکٹ مانیٹرنگ آفیسرز چوکنا رہیں اور ضابطہ اخلاق کی خلاف ورزی پر فوری ایکشن لیں۔
