اسلام آباد: (دنیا نیوز) وزیر اطلاعات شبلی فراز نے کہا ترکی میں زلزلے کے دوران قیمتی جانوں کے ضیاع پر گہرا دکھ اور افسوس ہے، آزمائش اور مشکل کی اس گھڑی میں ترک بہن بھائیوں کے غم میں برابر کے شریک ہیں، متاثرہ خاندانوں سے اظہار تعزیت اور زخمیوں کی جلد صحت یابی کیلئے دعا گو ہیں۔
دوسری جانب ترکی کے شہر ازمیر میں زلزلے نے عمارتوں کو ملیا میٹ کر دیا، ملبے تلے دب کر مرنے والے افراد کی تعداد 24 ہوگئی، 800 سے زائد لوگ زخمی بھی ہوئے۔
ترک حکام کے مطابق زلزلے سے ازمیر شہر زیادہ متاثر ہوا، جہاں عمارتوں کو زیادہ نقصان پہنچا۔ زلزلے کے بعد سطحِ سمندر بلند ہوگئی، جس سے پانی شہر سفر حصار میں داخل ہوگیا۔ سیلابی صورتحال سے متعدد ماہی گیر بھی لاپتہ ہوگئے۔
زلزلے کے جھٹکے یونان، قبرص، لیبیا، بلغاریہ، البانیہ سمیت خطے کے دیگر ممالک میں بھی محسوس کیے گئے۔ یونان میں زلزلے کے باعث آنے والے سونامی کی وجہ سے بندرگاہ سیموس میں کئی عمارتیں زیرِ آب آ گئیں۔
ترکی میں زلزلے سے متاثرہ علاقوں میں اب تک 21 آفٹر شاکس بھی آچکے ہیں۔ ترک صدر طیب اردوان کا کہنا ہے کہ زلزلےسے متاثرہ افراد کی امداد کیلئے تمام وسائل بروئے کار لائیں گے۔
