لاہور: (دنیا نیوز) میو ہسپتال میں نرسز سے انجکشن کے ری ایکشن سے اموات کا معاملہ، ڈرگ ٹیسنگ لیب کی رپورٹ میں انجکشن قابل استعمال قرار دے دیا گیا۔
دنیا نیوز نے ڈی ٹی ایل کی جانب سے جاری انجکشن کی کلچر رپورٹ حاصل کر لی، رپورٹ کے مطابق اینٹی بائیوٹک انجکشن سیفٹرائی ایگزون بالکل ٹھیک اور قابل استعمال قرار دے دیا گیا۔
ڈرگ ٹیسنگ لیب لاہور کی رپورٹ کے مطابق انجکشن کو مکس کرنے کیلئے ڈسلٹڈ واٹر کی بجائے کیلشیم اور رینگر لیکٹیٹ کا پانی مکس کیا گیا، انجکشن کے فیزیکل ٹیسٹ، ایسے ٹیسٹ اور ایڈینٹیفیکیشن ٹیسٹ کیے گئے، ٹیسٹ میں لیگو نوکین کے استعمال کے شواہد نہیں ملے۔
رپورٹ کے مطابق ٹیسٹ میں انجکشن بالکل ٹھیک جبکہ پاوڈر کو مکس کرنے کیلئے غلط پانی کا استعمال کیا گیا، اینٹی بائیوٹک پاؤڈر انجکشن کو مکس کرنے کیلئے جراثیم سے پاک پانی کی بجائے رینگر لیکٹیٹ اور کیلشیم کے پانی کا استعمال کیا گیا ہے۔
واضح رہے کہ انجکشن کے ری ایکشن سے دو مریض جاں بحق جبکہ 14 شدید متاثر ہوئے تھے، 10 مارچ کو انجکشن کے نمونے ٹیسٹ کیلئے لیبارٹری بھجوائے گئے تھے۔
صوبائی وزیر صحت خواجہ سلمان رفیق نے کہا کہ غفلت و لاپرواہی کی مرتکب تین نرسز کو پہلے ہی معطل کیا جا چکا ہے، اب رپورٹ میں بھی نرسز کی غلفت و کوتاہی ثابت ہو گئی ہے۔
خواجہ سلمان رفیق نے کہا کہ نرسز کے خلاف مزید کارروائی عمل میں لائی جائے گی تاکہ آئندہ ایسے واقعات رونما نہ ہو سکے۔
