راولپنڈی: (ویب ڈیسک) اقوام متحدہ کے ذیلی ادارے یونیسیف نے پاکستان میں رواں برس ستمبر سے انسداد سروائیکل کینسر مہم شروع کرنے کا اعلان کیا ہے۔
راولپنڈی میں یونیسیف کے زیر اہتمام ورکشاپ سے خطاب کرتے ہوئے یونیسیف حکام نے بتایا کہ پاکستان دنیا میں سروائیکل کینسر سے متاثرہ ساتواں ملک ہے، رواں برس ستمبر سے ملک بھر میں انسداد سروائیکل کینسر مہم شروع کی جائے گی۔
اس مہم کے دوران 9 سے 14 سال تک کی بچیوں کو ویکسین لگائی جائے گی جبکہ سال 2030 تک 90 فیصد بچیوں کو ایچ پی وی ویکسین لگانے کا ہدف مقرر کیا ہے۔
یونیسیف حکام نے مزید کہا کہ سروائیکل کینسر زیادہ تر بچیوں کو متاثر کرتا ہے جبکہ 35 سے 40 سال کی عمر میں خواتین سروائیکل کینسر سے متاثر ہوتی ہیں، سروائیکل کینسر اب قابل علاج مرض ہے اور اب حکومت پاکستان کے پاس اس کی ویکسین موجود ہے، خواتین کے لئے پنجاب بھر میں ویل ویمن کلینک قائم کئے گئے ہیں۔
