اسلام آباد: (دنیا نیوز) لیبیا کشتی حادثے میں ملوث انتہائی مطلوب انسانی سمگلر کو گرفتار کرلیا گیا۔
فیڈرل انویسٹی گیشن ایجنسی (ایف آئی اے) کے مطابق ملزم کی شناخت عامر حسین کے نام سے ہوئی، اسے ضلع کُرم سے گرفتار کیا گیا، گرفتار ملزم سادہ لوح شہریوں کو سمندر کے راستے یورپ بھجواتا تھا، ملزم عامر ایف آئی اے کوہاٹ کو فروری 2025 کے کشتی حادثے میں مطلوب تھا۔
ترجمان ایف آئی کے مطابق ملزم عامر حسین نے متاثرہ شہری نصرت حسین کو یورپ بھجوانے کیلئے37 لاکھ روپے بٹورے، ملزم نے دیگر ساتھیوں کی ملی بھگت سے متاثرہ شہریوں کو لیبیا کے راستے اٹلی بھجوانے کی کوشش کی۔
ترجمان کے مطابق ملزم کے ساتھی منیر حسین اور احمد اسلم یو اے ای، لیبیا اور اٹلی سے شاہ فیصل اور واجد علی یو اے ای، لیبیا اور اٹلی سے نیٹ ورک چلا رہے ہیں، گرفتار ملزم عامر حسین نے کشتی حادثے کے دیگر متاثرین سے بھی بھاری رقوم وصول کیں۔
ترجمان ایف آئی اے کے مطابق ملزم کے زیر استعمال بینک اکاؤنٹ کو پہلے ہی ضبط کیا جاچکا ہے، گینگ کے دیگر ملزمان کی بیرون ملک سے گرفتاری کیلئے انٹر پول سے رابطے کیے جا رہے ہیں۔
