لاہور: (دنیا نیوز) لاہور میں پولیس مقابلے کے دوران سنگین وارداتوں میں مطلوب انتہائی خطرناک ملزم مارا گیا۔
آرگنائزڈ کرائم یونٹ سٹی کوتوالی اور ڈاکوؤں کے درمیان فائرنگ کے تبادلے میں معصوم بچوں کو اغواء کرکے ان کے ساتھ زیادتی، چوری، نقب زنی، گاڑیوں کی چوری کی وارداتوں میں مطلوب انتہائی خطرناک ملزم ذیشان عرف شانی اپنے ہی ساتھیوں کی فائرنگ سے مارا گیا۔
پولیس حکام نے بتایا کہ آرگنائزڈ کرائم کی ٹیم ملزم کو اسلحہ کی برآمدگی کے لئے علاقہ تھانہ شاہدرہ ٹاؤن لے جارہی تھی، نامعلوم ملزموں نے اپنے زیر حراست ساتھی کو چھڑانے کے لئے پولیس پارٹی پر اندھا دھند فائرنگ کر دی، ملزم کے ساتھیوں کی فائرنگ سے ذیشان عرف شانی شدید زخمی ہو گیا جس کو ہسپتال منتقل کیا جا رہا تھا جو کہ راستے میں ہی دم توڑ گیا۔
پولیس حکام کے مطابق ہلاک ملزم لاہور، شیخوپورہ میں بچوں کو اغواء کرکے ان کے ساتھ زیادتی، ڈکیتی جیسے سنگین جرائم کی درجنوں وارداتوں میں مطلوب (اشتہاری) تھا، ملزمان کی فائرنگ سے پولیس اہلکار معجزانہ طور پر محفوظ رہے جبکہ نامعلوم ملزمان کی فائرنگ سے سرکاری گاڑی کو شدید نقصان پہنچا۔
حکام نے مزید بتایا کہ ہلاک ہونے والے ملزم کے دیگر ساتھی اندھیرے کا فائده اٹھاتے ہوئے فرار ہوگئے جن کی گرفتاری کے لئے علاقہ میں سرچ آپریشن شروع کر دیا گیا۔
