کراچی: (دنیا نیوز) رات گئے کراچی کے مختلف علاقوں میں ڈکیتی کے دوران مزاحمت پر 2 افراد زخمی ہو گئےِ جنہیں ہسپتال منتقل کر دیا گیا۔ ادھر پولیس نے شاہ فیصل کالونی اور اطراف کے علاقوں میں پاک سری لنکا میچ کے دوران امن و امان قائم رکھنے کے تناظرمیں سرچ آپریشن کیا۔
کراچی کے علاقے احسن آباد جامع مسجد کے قریب ڈکیتی مزاحمت پر فائرنگ کے نتیجے میں ایک شخص زخمی ہو گیا۔ ریسکیو ذرائع کے مطابق زخمی نیک محمد کو کندھے پر گولی لگی ہے جسے علاج کے لئے عباسی شہید ہسپتال منتقل کردیا گیا۔
ادھر لیاری شاہ بیگ لین میں ڈکیتی کے دوران مزاحمت پر چھریوں کے وار سے ایک شخص زخمی ہو گیا۔ زخمی شخص کی شناخت عابد کے نام سے ہوئی جسے مقامی ہسپتال منتقل کر دیا گیا ہے۔
دوسری جانب شاہ فیصل کالونی میں پولیس نے پاک سری لنکا میچ کے دوران امن و امان قائم رکھنے اور جرائم پیشہ عناصر کی موجودگی کی اطلاع پر سرچ آپریشن کیا۔ آپریشن کے دوران کوئی گرفتاری عمل میں نہیں آئی۔
