لاہور: (دنیا نیوز) کوئٹہ گلیڈی ایٹرز نے سپنر عثمان طارق کا بولنگ ایکشن ٹیسٹ کرانے کا فیصلہ کر لیا۔
ذرائع کے مطابق عثمان طارق کا ایکشن آئی سی سی سے منظور شدہ لیب سے کرایا جائے گا، عثمان طارق کا بولنگ ایکشن آئندہ چند روز میں لمز بائیو مکینک لیب سے کرائے جانے کا امکان ہے۔
کوئٹہ گلیڈی ایٹرز مینجمنٹ بولنگ ایکشن کلیئر ہونے تک عثمان طارق کو سکواڈ میں برقرار رکھنا چاہتی ہے، کوئٹہ گلیڈی ایٹرز مینجمنٹ سپنر کے کرکٹ کیریئر کو رسک میں نہیں ڈالنا چاہتی، عثمان طارق نیٹس میں کوچنگ سٹاف کے ساتھ اپنے بولنگ ایکشن پر کام کر رہے ہیں۔
ذرائع کے مطابق عثمان طارق کا بولنگ ایکشن 14 اپریل کو لاہور قلندرز کیخلاف میچ کے دوران مشکوک قرار دیا گیا تھا، آن فیلڈ امپائر احسن رضا اور کرس براؤن نے عثمان طارق کا ایکشن رپورٹ کیا تھا۔
قوانین کے مطابق عثمان طارق کو ٹورنامنٹ میں مزید بولنگ کی اجازت ہے، دوبارہ بولنگ ایکشن رپورٹ ہوا تو عثمان طارق کو بولنگ سے روک دیا جائے گا، عثمان طارق کا پی ایس ایل کے گزشتہ سیزن میں بھی بولنگ ایکشن مشکوک قرار دیا گیا تھا۔
