لاہور: (دنیا نیوز) پاکستان کرکٹ بورڈ (پی سی بی) کو مینز کرکٹ ٹیم کےلیے ہیڈ کوچ کی ضرورت ہے ،اشتہار بھی دے دیا گیا۔
خیال رہے کہ عاقب جاوید کو ٹیم کا عبوری ہیڈ کوچ مقرر کیا گیا تھا، عاقب جاوید کو چیمپئنز ٹرافی تک عبوری ہیڈ کوچ مقرر کیا گیا، تاہم دورہ نیوزی لینڈ کےلیے انہیں مزید ذمہ داریاں دی گئی تھیں۔
ذرائع نے بتایا کہ عاقب جاوید اب ہیڈ کوچ کےلیے دلچسپی نہیں رکھتے، وہ ڈائریکٹر ہائی پرفارمنس کےلیے دلچسپی رکھتے ہیں، پی سی بی ویب سائٹ پر ہیڈ کوچ کا اشتہار جاری کیا ہے۔
دوسری جانب پی سی بی نے ڈائریکٹر ہائی پرفارمنس کےلیے بھی اشتہار جاری کر دیا، ندیم خان کے مستعفی ہونے کے بعد ڈائریکٹر ہائی پرفارمنس کا عہدہ خالی تھا۔
ادھر ہیڈ کوچ کے حوالے سے ذرائع نے بتایا کہ پی سی بی ایک بار پھر غیر ملکی ہیڈ کوچ کی طرف جا سکتا ہے۔
