دبئی: (دنیا نیوز) آئی سی سی چیمپئنز ٹرافی کے ہائی وولٹیج ٹاکرے میں بھارت نے پاکستان کو 6 وکٹوں سے شکست دیدی۔
بھارت نے 242 رنز کا ہدف 4 وکٹوں کے نقصان پر 42.3 اوورز میں حاصل کرلیا، بھارت کی جانب سے ویرات کوہلی 100 سکور کیساتھ ناقابل شکست رہے۔
بھارت کی جانب سے ہدف کے تعاقب میں بیٹنگ کا آغاز روہت شرما اور شبھمن گل نے کیا جبکہ شاہین شاہ آفریدی نے اننگز کے پانچویں اوور کی آخری گیند پر روہت شرما کو کلین بولڈ کر کے 20 کے انفرادی جبکہ 31 کے مجموعی اسکور پر پویلین بھیجا۔
بعد ازاں ابرار احمد نے 17.3 اوور میں بھارتی بلے باز شبھمن گل کو 45 رنز پر کلین بولڈ کر کے پویلین بھیجا، یوں بھارت کو 100 کے مجموعی سکور پر دوسرے نقصان کا سامنا کرنا پڑا۔
ویرات کوہلی اور شریاس ائیر نے شاندار بیٹنگ کرتے ہوئے 114 رنز کی شراکت داری قائم کی تاہم 214 کے مجموعی اور 56 کے انفرادی اسکور پر شریار امام الحق کے ہاتھوں شاندار کیچ کے بعد پویلین روانہ ہوئے۔
اس کے بعد اگلے ہی اوور میں شاہین آفریدی نے کریز پر آتے ہی جارحانہ انداز اپنانے والے بلے باز ہاردک پانڈیا کو 223 کے مجموعی سکور پر پویلین بھیجا، انہوں نے 8 رنز کی اننگز کھیلی۔
پاکستان کی جانب سے شاہین شاہ آفریدی نے 2 جبکہ ابرار احمد اور خوشدشاہ نے ایک ایک وکٹ حاصل کی۔
قبل ازیں دبئی کرکٹ سٹیڈیم میں کھیلے گئے میچ میں پاکستان نے ٹاس جیت کر پہلے بیٹنگ کا فیصلہ کیا اور 49.4 اوورز میں پوری ٹیم 241 رنزبناکر آؤٹ ہوگئی۔
پاکستان کی جانب سے بابراعظم اور امام الحق نے کھیل کا آغاز کیا لیکن آج بھی بابر خاطر خواہ کارکردگی نہ دکھا سکے اور 26 گیندوں پر محض 23 رنز بنا کر پویلین لوٹ گئے، پاکستان کی دوسری وکٹ 47 رنز پر گری جب امام الحق رن آؤٹ ہوئے۔
تیسری وکٹ پر محمد رضوان اور سعود شکیل نے 103 رنز کی شراکت قائم کی، محمد رضوان 46 اور سعود شکیل 62 رنز بناکر آؤٹ ہوگئے، طیب طاہر صرف 4 رنز بناکر پویلین لوٹ گئے۔
پاکستان کی چھٹی وکٹ 200 کے مجموعی سکور پر گری جب سلمان علی آغا 19 رنز بنا کر کیچ تھما بیٹھے جبکہ اگلی ہی گیند پر شاہین شاہ آفریدی بغیر کوئی سکور بنائے چلتے بنے، نسیم شاہ 14 رنز بناکر آؤٹ ہوئے، حارث رؤف 8 سکور بناکر رن آؤٹ ہوگئے جبکہ خوشدل شاہ 38 رنز بناکر آؤٹ ہوئے۔
بھارت کی جانب سے کلدیپ یادو نے 3، ہاردک پانڈیا نے 2، رویندرا جڈیجا، ہرشیت رانا اور اکشر پٹیل نے ایک، ایک وکٹ حاصل کی۔
