لاہور: (ویب ڈیسک) پاکستان سپر لیگ (پی ایس ایل) کے نویں مرحلے کا شیڈول اور وینیوز کے فیصلے میں تاخیر سے فرنچائزز مالکان تشویش پریشانی کا شکار ہوگئے۔
پی ایس ایل 9 کے میچز پاکستان یا یو اے ای میں کروانے سے متعلق بھی اب تک اتفاق نہیں ہو سکا، ملک میں عام انتخابات کی وجہ سے میچز کو یو اے ای منتقل کرنے کی تجویز بھی سامنے آئی لیکن اس حوالے سے تاحال کوئی حتمی فیصلہ نہیں ہوا۔
ذرائع کا کہنا ہے کہ پاکستان کرکٹ بورڈ اس معاملے پر از خود فیصلہ کرنے کے بجائے ٹیموں سے مشاورت چاہتا ہے، اس حوالے سے رہنمائی کیلئے حکومت کو بھی خط لکھا جا چکا ہے۔
ذرائع نے بتایا ہے کہ اب تک پاکستان میں ہی میچز کو ذہن میں رکھ کر 2 مجوزہ شیڈول تیار کیے گئے ہیں، ایک شیڈول میں چار وینیوز کراچی، لاہور، ملتان اور راولپنڈی میں میچز کا لکھا گیا جبکہ دوسرے میں صرف ابتدائی 2 شہروں میں ہی مقابلوں کا ذکر ہے، گزشتہ روز یہ دونوں شیڈول فرنچائزز کے ساتھ شیئر بھی کر دیئے گئے۔
ذرائع کا کہنا ہے کہ ایونٹ کا آغاز18 فروری کو لاہور میں کرنے کی تجویز ہے، فائنل 19 مارچ کو کراچی میں کرانے کا ارادہ ظاہر کر دیا گیا، اس حوالے سے جلد کوئی فیصلہ متوقع ہے۔
کئی غیرملکی کرکٹرز بھی یو اے ای میں ہی کھیلنے پر اصرار کر رہے ہیں، البتہ تمام فرنچائز مالکان ہی اس حوالے سے تاحال ایک پیج پر نہیں ہیں، بعض پاکستان جبکہ دیگر یو اے ای میں میچز چاہتے ہیں۔
