لاہور: (ویب ڈیسک) قومی فاسٹ باؤلر حارث رؤف کی دورہ آسٹریلیا سے دستبرداری پر سوال اٹھنے لگے۔
پاکستان کی جانب سے آسٹریلیا کے ٹیسٹ ٹور کیلئے سکواڈ کا اعلان کیا گیا تاہم اس میں حارث رؤف شامل نہیں تھے، ان کی جانب سے آخری لمحات میں ٹور سے دستبرداری اختیار کی گئی جس پر سوال اٹھائے جارہے ہیں۔
خود نئے چیف سلیکٹر وہاب ریاض بھی فاسٹ باؤلر کے اس فیصلے پر مایوس دکھائی دئیے، انہوں نے اسے پاکستان کرکٹ کیلئے بھی نقصان دہ قرار دیا۔
پریس کانفرنس کے دوران وہاب کا کہنا تھا کہ حارث رؤف ایک امپیکٹ پلیئر ہے اور ہمیں ان کی صلاحیتوں سے ٹیسٹ کرکٹ میں فائدہ اٹھانے کی ضرورت ہے، ہم نے ان سے صرف ایک دن میں 10 سے 12 اوورز کرانے کا مطالبہ کیا، اتنے تو وہ حال ہی میں ون ڈے کرکٹ میں کرتے رہے ہیں، ٹیم مینجمنٹ نے ان سے بات کی تھی مگر وہ راضی نہیں ہوئے۔
انہوں نے کہا کہ ہمارا مسئلہ یہ ہے کہ ہمارے وہ باؤلرز جو 140 میل فی گھنٹہ کی رفتار سے باؤلنگ کرتے ہیں وہ ان فٹ ہیں، اس لیے ایک پلیئر ہونے کے ناطے آپ کو قربانی دینے کی ضرورت ہوتی ہے، آپ کو پاکستان کیلئے کھیلنا چاہیے نہ کہ پیٹھ دکھائیں۔
