لاہور: (دنیا نیوز) قومی آل راؤنڈر محمد حفیظ نے دورہ بنگلادیش پر نہ جانے کا فیصلہ کرلیا۔ پروفیسر نے چیف سلیکٹر کو آگاہ کر دیا۔
پاکستان ٹیم دبئی سے ڈھاکا سیریز کھیلنے جائے گی۔ دورہ بنگلا دیش کی ٹی 20 سیریز کیلئے افتخار احمد کو ٹیم میں شامل کرلیا گیا ہے۔
خیال رہے قومی کرکٹ ٹیم پانچ سال بعد بنگلہ دیش کا دورہ کرے گی۔ پاکستان کرکٹ ٹیم دورہ بنگلادیش میں 3 ٹی ٹونٹی انٹرنیشنل میچز اور 2 ٹیسٹ میچ کھیلی گی، یہ دونوں میچز آئی سی سی ورلڈ ٹیسٹ چیمپئن شپ کا حصہ ہوں گے۔
دورے میں شامل تمام ٹی ٹونٹی انٹرنیشنل میچز شیر بنگلا اسٹیڈیم ڈھاکہ میں کھیلے جائیں گے، یہ میچز 19، 20 اور 21 نومبر کو کھیلے جائیں گے۔ دونوں ٹیموں کے مابین ٹیسٹ سیریز کا پہلا میچ ظہور احمد چوہدری اسٹیڈیم چٹا گانگ میں کھیلا جائے گا، یہ میچ 26 سے 30 نومبر تک جاری رہے گا، سیریز کا دوسرا ٹیسٹ میچ 4 سے 8 دسمبرتک ڈھاکہ میں کھیلا جائے گا۔
