گاڑیوں کی ٹرانسفر فیس میں ہزاروں روپے اضافہ، الیکٹرک گاڑیوں پر بھی ٹیکس عائد

اسلام آباد : (دنیا نیوز) اسلام آباد میں گاڑیوں کی ٹرانسفر فیس میں ہزاروں روپے اضافہ کر دیا گیا، پہلی بار الیکٹرک گاڑیوں پر بھی ٹرانسفر فیس عائد کر دی گئی۔

ٹرنسپورٹ اتھارٹی کی طرف سے 1000 سی سی تک کی گاڑی کی منتقلی فیس 1200 سے بڑھا کر 2750 روپے کر دی گئی، 1000 سے 1800 سی سی تک کی گاڑیوں کی فیس 2000 سے بڑھا کر 5500 روپے کر دی گئی، 1800 سی سی سے زائد کی گاڑیوں کی فیس 3000 سے بڑھ کر 11000 روپے ہو گئی۔

پہلی بار الیکٹرک گاڑیوں پر بھی منتقلی فیس عائد کر دی گئی، 50 کلو واٹ تک کی الیکٹرک گاڑی پر 2500 روپے فیس مقرر، 50 سے 100 کلو واٹ تک کی الیکٹرک گاڑی پر 5500 روپے فیس لاگو کر دی گئی، 100 کلو واٹ سے زائد الیکٹرک گاڑی کی منتقلی فیس 10000 روپے ہو گئی۔

اتھارٹی کی طرف سے 200 سی سی تک کی موٹر بائیک کی فیس 150 سے بڑھا کر 550 روپے کی گئی ہے، 200 سے 400 سی سی موٹر بائیک کی فیس 1000 روپے مقرر جبکہ 400 سی سی سے زائد کی موٹر بائیک کی فیس 1500 روپے ہو گئی۔

تمام فیسیں وزارتِ خزانہ کے مقررہ اکاؤنٹ میں جمع کروائی جائیں گی۔