ریاض : (ویب ڈیسک ) سعودی حکام نے کہا ہے کہ مدینہ میں حج سیزن کا پہلا مرحلہ کامیابی سے مکمل ہو گیا۔
سعودی خبررساں ادارے کے مطابق مدینہ گورنریٹ اور دیگر حکومتی اداروں نے مشترکہ طور پرمختلف ممالک سے بری اور فضائی راستوں سے براہ راست مدینہ آنے والے آٹھ لاکھ 33 ہزار عازمین کو مرحلہ وار مکہ روانہ کر کے حج سیزن کا پہلا مرحلہ کامیابی سے مکمل کر لیا ہے ۔
گزشتہ روز مدینہ سے عازمین کے آخری قافلے مکہ کے لیے روانہ ہوئے جس کے لیے ہجرہ روڈ پر بنے ہوئے حجاج استقبالیہ سینٹر میں گہما گہمی رہی، عازمین حج کی مکہ منتقلی کی کارروائی کی نگرانی وزارت حج کی جانب سے کی گئی تاکہ عازمین حج کو کسی قسم کی دشواری کا سامنا نہ کرنا پڑے۔
ٹرانسپورٹ کے شعبے کے نگران مازن ثروت نے کہا کہ ہجرہ روڈ پر واقع ڈیپارچر سینٹر میں تمام امور پروگرام کے مطابق مکمل کیے گئے ، عازمین کی بسوں کا فنی معائنہ کرنے کے بعد ہی انہیں روانہ کیا جاتا ہے۔
واضح رہے کہ حج سیزن میں مدینہ آنے والے عازمین حج آٹھ دن قیام کرتے ہیں بعدازاں مکہ روانہ ہو جاتے ہیں ، جو عازمین براہ راست مدینہ آتے ہیں ان کی واپسی جدہ سے ہوتی ہے جبکہ حج کے بعد آنے والے حجاج کی واپسی مدینہ سے ہی کی جاتی ہے۔
