بیونس آئرس : (ویب ڈیسک) ارجنٹینا میں ایک نوجوان نے صرف دو پاؤنڈ میں دنیا کی سب سے بڑی ویب سائٹ گوگل کی ڈومین خرید لی۔
غیر ملکی میڈیا کے مطابق کسی بھی ویب سائٹ کی شناخت اسکا ڈومین (ویب سائٹ کا نام) ہوتا ہے لیکن کبھی کبھی بڑی کمپنیاں اپنے ڈومین کو ری نیو کروانا بھول جاتی ہے۔ ایسا ہی کچھ ارجنٹینا میں ہوا، جب ایک ویب ڈویلپر نے ٹیکنالوجی جائنٹ گوگل کے ڈومین کو محض دو پاؤنڈ میں خرید لیا۔
گوگل ارجنٹینا کی ویب سائٹ Google.com.ar نامعلوم وجوہات کی بنا پردو گھنٹے کے لیے ڈاؤن رہی۔ اسی دوران جب 30 سالہ ویب ڈویلپر نکولس کیورونا نے اپنے ایک کلائنٹ کے لیے ارجنٹینا کے ڈومین نام فروخت کرنے والے ادارے نیٹ ورک انفارمیشن سینٹر ارجنٹینا کی ویب سائٹ وزٹ کی تو وہاں پر گوگل ارجنٹینا کے ڈومین کی فروخت کا اشتہار تھا۔
Quiero aclarar que entre a https://t.co/XtzUy8WL36 vi el nombre de https://t.co/cK20BdyuxB disponible y lo compre legalmente como corresponde!
— Nicolas David Kuroña (@Argentop) April 22, 2021
نکولس نے اس ڈومین کو 270 پیسو( 2پاؤنڈ) میں خرید کر اس کی تصویر اپنے ٹوئٹر اکاؤنٹ پر شیئر بھی کردی۔ جس کے بعد کچھ ہی گھنٹوں میں اس ٹوئٹ کو 79ہزار سے زائد لوگوں نے پسند کرلیا۔
دوسری جانب گوگل ارجنٹینا نے اس خبر کی تصدیق کرتے ہوئے کہا ہے کہ ان کے ڈومین Google.com.ar کو کسی دوسرے فرد نے خرید لیا تھا تاہم نے گوگل نےاس ڈومین کا کنٹرول دوبارہ حاصل کرلیا ہے۔
اس بارے میں ٹوئٹر صارفین کا کہنا ہے کہ گوگل اپنے ڈومین کو ری نیو کرنا بھول گیا ہوگا، تاہم گوگل ترجمان نے اس بات کی اب تک کوئی وضاحت نہیں کی کہ کن وجوہات کی بنا پر اس ڈومین کو فروخت کے لیے پیش کیا گیا تھا، تاہم ان کا کہنا ہے کہ مذکورہ ڈومین نیم کی ایکسپائری ڈیٹ جولائی 2021 ہے۔
