نیویارک: (روزنامہ دنیا) سوشل میڈیا پر ایک ایسے بہت بڑے ‘چوہے ’ کی ویڈیو وائرل ہو گئی ہے جو روزانہ نیویارک کے سب وے میں دکھائی دیتا ہے ، اور لوگوں کے ساتھ یہ ٹرین میں چڑھ کر سفر کرتا ہے۔
میڈیا رپورٹ کے مطابق شروع شروع میں تو لوگ اس کو دیکھ کر اچنبھے کا اظہار کرتے تاہم آہستہ آہستہ وہ اس سے مانوس ہو گئے، اور ہوں تو بھی کیوں نا، یہ کوئی اصل چوہا تھوڑی ہے بلکہ کورونا سے بچاؤ کے لیے ضروری فیس ماسک کی جگہ چوہے کے سر جیسا بڑا ماسک چڑھا کر کام پر جاتا ہے ، نہ صرف یہ بلکہ وہ چوہے جیسا یونی فارم بھی پہنتا ہے جس میں ایک عدد لمبی دم بھی ہوتی ہے ۔ کسی نے اس کی ویڈیو بھی بنا لی، جو سوشل میڈیا پر بہت زیادہ وائرل ہو گئی۔
کورونا وبا جب سے پھیلی ہے تو لوگ ماسک پہننے کے ساتھ ساتھ دلچسپ کام بھی کرنے لگے، ہر کسی کو سماجی فاصلے کابار بار کہہ کر لڑائی تو مول نہیں لی جا سکتی اس کا حل انہوں نے ایسے ماسک پہننے میں نکالا کہ لوگ ان سے خود بخود دوری اختیار کریں۔ کوئی خلانورد کا لباس پہنے گھر سے نکلنے لگا تو کسی نے اپنے ارد گرد باکس بنا لیا جس سے لوگ خودبخود اس سے دور ہونے لگے۔
Oh NYC is dead? Explain this pic.twitter.com/XlfuB3eO2G
— Alison Williams (@therealalisonw) November 14, 2020
اب چوہے جیسا بھیس بھی تو اسی لئے ہے نا کہ لوگوں کی اکثریت چوہے سے دور بھاگتی ہے اور خواتین تو چوہے سے ڈرتی بھی ہیں تو سماجی فاصلے کیلئے چوہا بننا اور وہ بھی ایک تھیٹر پر کام کرنے والے فنکارکیلئے محفوظ اور دلچسپ دونوں ہے۔
