دنیا کی سب سے مہنگی موٹر بائیک 19 کروڑ میں دستیاب

واشنگٹن(نیٹ نیوز ) ہارلے ڈیوڈسن بلیو ایڈیشن میں سوئٹزرلینڈ کی بوکارر گھڑی اور 360 ہیرے جڑے ہیں۔ دنیا کی اس سب سے مہنگی موٹربائیک کو ہارلے ڈیوڈسن بلیو ایڈیشن کا نام دیا گیا ہے جس کی قیمت 19 لاکھ ڈالر یعنی 19 کروڑ روپے ہے۔

موٹر سائیکل کے ساتھ سوئٹزر لینڈ کی دو عدد بوکارر گھڑیاں اور ہیرے کی ایک خوبصورت انگوٹھی بھی دی جارہی ہے۔ موٹر سائیکل میں 360 ہیرے جڑے ہیں اور تمام نٹ بولٹس اور سکریو پر سونے کا پانی چڑھایا گیا ہے۔

بائیک میں شیشے کا ایک خوبصورت بلبلہ ہے جس کے اندر آپ قیمتی انگوٹھی اور دونوں گھڑیاں سجا کر رکھ سکتے ہیں۔ موٹرسائیکل پر بنا یہ زیور کا ڈبہ پوری بائیک کی تھرتھراہٹ اور جھٹکوں سے محفوظ رہتا ہے اور یوں آپکی قیمتی گھڑی کو کوئی نقصان نہیں پہنچتا۔
موٹرسائیکل کے بہت سے حصوں کو ماہرین نے ہاتھوں سے جوڑا ہے اور کئی پرزے ماہر کاریگروں نے خود بنائے ہیں جس میں 2500 گھنٹے کی محنت صرف ہوئی ہے۔ موٹرسائیکل کے ایک ایک پرزے کو ہاتھوں سے ڈھالا، ویلڈ اور پالش کیا گیا ہے۔

انجن کور پر ایک بڑا سوراخ کیا گیا ہے جس میں دنیا کا پہلا ایل ای ڈی سے روشن جھروکہ بنایا گیا ہے جس کے اندر سے آپ انجن کے ایک ایک پرزے کو متحرک دیکھ سکتے ہیں۔ پیر رکھنے والے فٹ ریسٹ پر بھی سونے کا پانی چڑھایا گیا ہے۔ بائیک کے ہینڈل پر ہیرے نصب کیے گئے ہیں۔