اسلام آباد: (دنیا نیوز) وفاقی دارالحکومت اسلام آباد میں عوام کی سہولت کیلئے متعدد نئے ترقیاتی منصوبے شروع کرنے کا فیصلہ کیا گیا ہے۔
وفاقی وزیر داخلہ محسن نقوی کی زیر صدارت سی ڈی اے میں اہم اجلاس منعقد ہوا جس میں نئے منصوبوں کی باضابطہ منظوری دی گئی، اجلاس میں ٹریفک کے دیرینہ مسائل کو حل کرنے کیلئے فیض آباد انٹرچینج کی ری ماڈلنگ کا فیصلہ بھی کیا گیا، فیض آباد انٹرچینج میں توسیع کرتے ہوئے 2 نئی لینز کا اضافہ بھی کیا جائے گا۔
اجلاس میں فیصل چوک پر ٹریفک کی روانی کو بہتر بنانے کیلئے 2+2 لین کے انڈر پاس کی تعمیر کا فیصلہ کیا گیا ہے۔
محسن نقوی نے ہدایت دی کہ انڈر پاس کی پلاننگ آئندہ ضروریات کو مدِنظر رکھتے ہوئے کی جائے، اسی طرح بلیو ایریا میں مکمل شدہ پارکنگ پلازہ کو جلد فعال کرنے کا فیصلہ بھی کیا گیا ہے۔
وفاقی وزیر داخلہ نے پارکنگ پلازہ اور فوڈ سٹریٹ کیلئے جدید اور منافع بخش بزنس ماڈل تیار کرنے کی ہدایت دی، شہر کے دیگر علاقوں میں بھی پارکنگ پلازوں کی تعمیر کی منظوری دی گئی جبکہ مقامات کی جلد نشاندہی کرنے کی ہدایت دی گئی۔
اجلاس میں وزیر مملکت برائے داخلہ طلال چودھری، سیکرٹری داخلہ خرم آغا، چیئرمین سی ڈی اے محمد علی رندھاوا، آئی جی پولیس اور دیگر اعلیٰ حکام شریک ہوئے۔
دورانِ اجلاس بریفنگ میں بتایا گیا کہ بلیو ایریا فوڈ سٹریٹ میں پیڈسٹرین ٹریکس، فوڈ سٹالز، بیٹھنے کے بنچز اور تفریحی سرگرمیوں کے لئے مخصوص جگہوں کا تعین ہو چکا ہے، بلیو ایریا پارکنگ پلازہ میں کمرشل دکانیں، روف ٹاپ ریستوران، پلے لینڈ، سینما اور دیگر سہولیات بھی فراہم کی جائیں گی۔
