لاہور:(دنیا نیوز) سپیکر پنجاب اسمبلی ملک محمد احمد خان نے کہا ہے کہ جے یو آئی ف اور جماعت اسلامی کے اتحاد سے حکومت کو کوئی خطرہ نہیں۔
پنجاب اسمبلی کے احاطے میں میڈیا سے گفتگو کرتے ہوئے ملک محمد احمد خان کا کہنا تھا کہ ملکی معیشت ترقی کررہی ہے، صرف ایک جماعت کی جانب سے معمولی نوعیت کے سیاسی بلبلے بنتے ہیں، مولانا فضل الرحمان اور جماعت اسلامی کا اتحاد سیاسی طورپر خوش آئند ہے۔
انہوں نے کہا کہ دونوں جماعتیں ماضی میں بھی متحدہ مجلس عمل کے پلیٹ فارم سے کاوشیں کر چکی ہے، حکومت کا کام کسانوں کو سہولت فراہم کرنا ہے، حکومت جب سپورٹ پرائس کےمسئلے سے باہر نکل رہی ہے تو اسے کسانوں کے دیگر مسائل کو بھی دیکھنا ہوگا۔
سپیکر پنجاب اسمبلی کا کہنا تھا کہ میرا یہ خیال ہے کہ حکومت اگر سپورٹ پرائس دیتی ہے تو اس کا اثر پیداوار پر کتنا پڑتا ہے، کیا ہمارا کسان بھی ایک ایکٹر میں سے سو من گندم کی پیداوار حاصل کررہا ہے، 1994ءمیں پہلی مرتبہ زرعی ٹیکس کی بات کی گئی۔
محمد احمد خان نے کہا کہ اس وقت پتہ چلا کہ 94فیصد کاشتکاروں کے پاس ساڑھے بارہ ایکٹر رقبہ موجود ہے، اب یہ رقبہ وراثتوں کی تقسیم کے بعد مزید کم ہوگیا ہوگا، سندھ کے پانی کی تقسیم پر اعتراضات کو بلیک میلنگ نہیں سمجھتا، پانی کی تقسیم کے حوالے سے خدشات پر بات ضرور ہونی چاہیے۔
ان کا مزید کہنا تھا کہ دہشت گردی کے خاتمہ کےلیے سپہ سالار نے وہ بات کی جس کے پیچھے پوری قوم کھڑی ہے، کوئی ایک گروہ ہم سے ہمارا ملک اور ہماری طرز معاشرت چھین نہیں سکتا، پاکستانی ایک مضبوط قوم ہے اور دہشت گردی کا ڈٹ کر مقابلہ کریں گے۔
