لاہور: (دنیا نیوز) وزیراعلیٰ پنجاب مریم نواز نے آسان کاروبار فنانس کیلئے ضرورت کے مطابق قرض دینے کا حکم دے دیا۔
وزیراعلیٰ پنجاب مریم نواز شریف کی زیر صدارت خصوصی اجلاس ہوا جس میں آسان کاروبار فنانس اور آسان کاروبار کارڈ پراجیکٹس پر پیش رفت کا جائزہ لیا گیا۔
اجلاس میں بریفنگ دیتے ہوئے بتایا گیا کہ قرض حاصل کرنے والوں میں ٹرانسپورٹ، فارماسوٹیکل اور چھوٹے کاروبار کرنے والے افراد شامل ہیں، آسان کاروبار فنانس کیلئے 80 ہزار سے زائد افراد کی قرض کی درخواستیں منظور کی گئیں اور 34 ہزار کاروباری افراد کیلئے لون کا اجراء کیا گیا۔
وزیراعلیٰ نے سکیم کو آسان تر بنانے کی ہدایت کر دی اور نئے یونٹ قائم کرنے والے کاروباری افراد کی حوصلہ افزائی کا حکم بھی دیا، وزیراعلیٰ نے قرض حاصل کرنے والے تمام افراد سے فیڈ بیک لینے کی ہدایت کر دی۔
مریم نواز شریف نے اجلاس کے دوران ہی قرض حاصل کرنے والے افراد سے فون پر بات چیت کی اور قرض حاصل کرنے کے مراحل کے بارے میں دریافت کیا، وزیراعلیٰ نے کریانہ سٹور کا کاروبار کرنے والے عدنان علی سے بات چیت کی۔
عدنان علی نے آسان کاروبار فنانس کارڈ کے ذریعے 3 لاکھ 55 ہزار روپے ملنے پر اظہار تشکر کیا، اس نے بتایا کہ رقم سے سامان کریانہ سٹور میں ڈالنے سے کاروبار بڑھا۔
اس کے علاوہ تونسہ سے زرعی مداخل کا کاروبار کرنے والے معین الدین نے وزیراعلیٰ مریم نواز شریف سے گفتگو کر کے شکریہ ادا کیا، اس نے بتایا ایک لاکھ 56 ہزار روپے کا کھل، بنولہ، چوکر ونڈا ڈالنے سے کاروبار میں بہتری آئی، آسان کاروبار فنانس کارڈ جیسی سکیم شروع کرنے پر محمد نواز شریف اور وزیراعلیٰ کا شکریہ ادا کرتا ہوں۔
ادھر لودھراں کے نواحی گاؤں 104 میں کریانہ کی دکان چلانے والے ندیم احمد سے وزیراعلیٰ مریم نواز شریف کی گفتگو ہوئی، اس نے بتایا کہ عید سے پہلے 8 لاکھ روپے آسان کاروبار فنانس کے ذریعے ملنے سے دکان میں زیادہ مال ڈال لیا اور کاروبار بڑھ گیا۔
وزیراعلیٰ مریم نواز شریف نے کاروبار فنانس سکیم میں شامل افراد کی کامیابی کی دعائیں کیں۔
